Գեղամասար խոշորացված համայնքի բնակիչներն այսօր առավոտից փակել են Վարդենիս-Սոթք ճանապարհը: Բնակիչները դեմ են համայնքների խոշորացման ծրագրին, որով նախատեսվում է միավորել նաև Գեղամասար և Վարդենիս համայնքները:
Ոստիկաններից մեկն ասաց, որ կա կառավարություն, մարզպետարան, բնակիչները թող դիմում ներկայացնեն իրենց հուզող հարցերի վերաբերյալ։
«Ճանապարհը փակելով այլ անձանց ազատ տեղաշարժի իրավունքը ոտնահարում եք։ Գնացեք ձեր գյուղապետարանի մոտ, ակցիա արեք, ոչ թե ճանապարհը փակեք։ Ճանապարհը պետք է բացվի, այլապես ոստիկանական ուժերով կբացվի»,- ասաց ոստիկանը։
Գեղամասար համայնքի ղեկավար Հակոբ Ավետյանն ասաց, որ ժողովուրդը դեմ է խոշորացմանը, սակայն հաշվի չեն առնում բնակիչների կարծիքը։
«Դիմել են տարածքային կառավարման և ենթակառուցվածքների նախարար Գնել Սանոսյանին, ոչ մի արձագանք չկա։ Այս 18 գյուղը սահմանապահ գյուղ են, պաշտպանում են սահմանները, նաև ապրում են սահմանի վրա և այդ մարդկանց կարծիքն ընդհանրապես հաշվի չառնելն անբարոյական է, շատ անհարգալից վերաբերմունք է, որն առաջացնում է ժողովրդի դժգոհությունը։ Մարդիկ ստիպված դուրս են եկել ու ճանապարահ են փակել։ Ժողովուրդը հասկանում է, որ իզուր է կառավարությանը դիմել, ես էլ եմ հասկանում, որ իզուր է»,- նշեց նա։
Հ. Ավետյանն ասաց, որ սահմանի վրա ապրող մարդը ստիպված իր գործը թողնել, ճանապարհ է փակել, որ իրեն մարդ համարեն, սակայն արձագանք չկա, ինչը շատ վատ վերաբերմունք է մեր իշխանությունների կողմից ժողովրդի հանդեպ։
«Հենա մեր գլխավերում թուրքն է կանգած, թող գան, այս վիճակը քննարկենք։ Գնել Սանոսյանն ինձ անձամբ ասել է՝ ձեր համայնքը ցրելու են, դու էլ դատվելու ես։ Քաղաքական հայացքների հետ է կապված, ով իրենց հետ չէ, դուշման են նայում։ Եթե Հայաստանում խնդիրը ես եմ, որ ինձ դատեն, հարցերը լուծվում են, գնամ կամավոր նստեմ, բոլոր հարցերը լուծվեն»,- նշեց Ավետյանը։
Ակցիայի մասնակիցներից մեկը դիմելով ոստիկաններին ասաց. «Չի բացվելու ճանապարհը, Նիկոլը պետք է գա այստեղ»։
«Նորմալ արտահայատվի վարչապետի վերաբերյալ։ Վարչապետի անունն այդպես մի շոշափի»,- արձագանքեց ոստիկանը։
«Էլ ինչ վարչապետ, թուրքը լցված է այստեղ»,- նշեց ակցիայի մասնակիցը։
«Թող մարդ գա, այս հարցը լուծվի»,- ասացին համայնքի բնակիչները։
«Պետք է գան, Վարդենիսն էլ գրավեն, որ հանգստանան»,- նշեց մեկ այլ բնակիչ։
«Ասում եմ անօրինական գործողություն է, պետք է բացվի ճանապարհը»,- բղավելով ասաց ոստիկանը։
Բնակիչները շարունակում են փակ պահել ճանապարհը, երբեմն-երբեմն բացելով թողնել մի քանի մեքենա անցնի։ Ոստիկանների ու ակցիայի մասնակիցների միջև քաշքշոց եղավ։
«Մենք մեր համայնքը չենք տալու»,- ասացին ակցիայի մասնակիցները։
«Մենք մեր լուրջ խնդիրը թողած՝ ընկել ենք այս խնդրի հետևից։ Հետո որ ժողովուրդը թողնի գնա, պոստ պահող էլ չենք ունենալու»,- ասաց սահմանապահ գյուղի բնակիչը։
«Թուրքերը եկել, հասել են այստեղ, վախենում ենք դպրոց ուղարկել երեխաներին։ Մենք ուզում ենք ապահով ապրել»,- նշեց ակցիայի մասնակից մի կին։