Բարձրաստիճան պաշտոնյաները՝ Նիկոլ Փաշինանի գլխավորությամբ, այցելել էին Եռաբլուր զինվորական պանթեոն, որտեղ սահմանափակված էր լրագրողների աշխատանքը։ Մինչ պաշտոնյաների ժամանելը, Եռաբլուրում էին զոհված ու անհետ կորած զինծառայողների հարազատները, վերջիններս զրուցում էին լրագրողների հետ, սակայն ոստիկաններըն ու ԱԱԾ աշխատակիցները նրանց հեռացրեցին Եռաբլուրի տարածքից:
ԿԳՄՍ նախարար Վահրամ Դումանյանը նշում է, որ որևէ արգելք չի տեսել, բերման ենթարկելու դեպք՝ ևս։
«Ես շրջել եմ գերեզմաններով, ծաղիկներ դրել շիրմաքարերին, խունկ եմ ծխացրել։ Այնտեղ կային սգացող բազմաթիվ մարդիկ։ Ես խոսել եմ նրանց հետ։ Ես որևիցե մեկին բերման ենթարկվող, կամ սահմանափակման ենթարկվածի այնտեղ չեմ տեսել»։
Դումանյանը նշեց, որ ձայներ չի լսել, տարօրինակ ոչինչ չի նկատել։ Նախարարը, սակայն, չմեկնաբանեց, թե Եռաբլուրում՝ այսօր ինչու՞ է սահմանափակվել լրագրողների աշխատանքը։
«Ցանկացած միջոցառում ունի անվտանգային պահեր։ Այսօր այդ օրը չէ, որ ես մեկնաբանեմ մի բան, որը ես չեմ տեսել»։
Հարցին՝ գունագեղ միջոցառմանը մասնակցելո՞ւ է, Դումանյանը հարցին չպատասխանեց։