Այսօր Ադրբեջանը և թուրքադրբեջանական տանդեմն ամեն ինչ անում է, որ Սյունիքում միջանցք լինի։ Խոսք է գնում ճանապարհների ապաշրջափակման մասին, բայց այդ ապաշրջափակումը բերելու է Հայաստանի և Արցախի խորը շրջափակման՝ և՛ տնտեսական, և՛ ժողովրդագրական հարցերում։ Այս մասին լրագրողների հետ զրույցում ասաց «Հայաստան» խմբակցության ղեկավար, ՊՆ նախկին նախարար Սեյրան Օհանյանը։
Դիտարկմանը, որ տպավորություն է՝ սահմանազատման աշխատանքներն արդեն սկսվել է, ոստիկանական հենակետ է դրվում Որոտանի հատվածում, հետո իշխանությունները դրանք ադրբեջանական տեղանուններով են մատնանշում, Օհանյանը նշեց, որ մամուլի հրապարակումներից իրենք էլ են լսում, որ հենք են ստեղծում՝ սահմանազատման և սահմանագծման, բայց դրա համար առաջին պայմանը խաղաղության պայմանագիրն է։
«Եթե չկա այդ խաղաղության պայմանագիրը, չկա այդ իրավական հենքը, ապա խոսել դրա մասին՝ ժամանակավրեպ է։ Մանավանդ, որ ժամանակին մենք ասում էինք, որ չպետք է թույլ տալ մեր սահմաններում, կարևոր ռազմավարական կետերում՝ ճանապարհներում, բարձունքներում հայտնվեն ադրբեջանցիներ, որովհետև հետագայում շատ դժվար է լինելու իրական սահմանազատման ժամանակ նրանց այդտեղից դուրս շպրտել»,-նշեց Օհանյանը։
Դիտարկմանը, որ խոսվում է խաղաղության պայմանագրի մասին և ասում, որ դրա գինը պետք է լինի Արցախի մնացած հատվածից հրաժարվելը, արդյո՞ք այդ գնով պայմանագիրը ձեռնտու կարող է լինել ՀՀ-ի համար, Օհանյանն արձագանքեց.
«Իհարկե՝ ոչ։ Եթե խոսում ենք խաղաղության մասին, դա նշանակում է, որ պետք է խոսք գնա երկու կողմերի տարածքային ամբողջականության մասին, իսկ Ադրբեջանի տարածքային ամբողջականություն՝ նշանակում է մեծ հարված Արցախին։ Այս պահին մենք չունենք այդ հենքը՝ գնալ ժամանակավրեպ սահմանազատման»։
Անդրադառնալով հարցին, թե ի՞նչ դրական ազդակներ կան Թուրքիայից՝ Օհանյանը պատասխանեց. «Էրդողանի բարեկամներին կարելի է հարցնել, թե ՀՀ-ում ովքեր են իրենց մտերիմները»։