Այս ժամանակահատվածում երբևիցե իշխող խմբակցության կողմից իրադրության, անվտանգության, սահմանային խնդիրների վերաբերյալ հրատապ քննարկման նախաձեռնություն չի եղել: Խորհրդարանում հայտարարեց ընդդիմադիր «Հայաստան» խմբակցության ղեկավար Սեյրան Օհանյանը՝ պատասխանելով Ռուբեն Ռուբինյանին, որն ավելի վաղ հայտարարել էր, թե ընդդիմությանը փակ քննարկման առաջարկ են արել, սակայն ընդդիմությունը մերժել է:
Սեյրան Օհանյանը հայտնեց, որ երեկ ինքն է զանգահարել Ռուբինյանին և առաջարկել, որպեսզի ԱԺ խորհրդի նիստ հրավիրեն և հստակեցնել՝ այս իրավիճակում ի՞նչ պետք է անի խորհրդարանը և ի՞նչ վերահսկողություն պետք է իրականացվի գործադիրի նկատմամբ.
«Պատասխանը եղել է այն, որ վարչապետը ցանկանում է գալ և ԱԺ խորհրդում ներկայացնել իրավիճակը։ Բայց առաջին հերթին մենք ինքներս պետք է հասկանանք, թե ինչ ենք ուզում։ Մենք այսօր առաջարկել ենք խորհրդի նիստում, որ ներկայացվեն և անվտանգությանը, և արտաքին քաղաքականությանը վերաբերող բոլոր այն փաստաթղթերը, որոնք շրջանառության մեջ են այսօր։ Որից հետո մեր խմբակցությունը որոշում կընդունի, թե ինչ ձևաչափով հրավիրել գործադիրի ներկայացուցիչներին։ Փաստաթղթերն ուսումնասիրելուց հետո ի՞նչն էր խանգարում, որ ՀՀ վարչապետը 107 պատգամավորների ներկայությամբ ներկայացներ իրավիճակը։ Եվ ես գտնում եմ, որ իրավիճակին ռեալ նախաձեռնողական գնահատական տալու փոխարեն մենք նորից զբաղված ենք երկրորդական խնդիրներով»,- ասաց Սեյրան Օհանյանը։