Ընդդիմությունն այս պահին քայլերթով Տիգրանաշենից շարժվում է դեպի Երևան։ Երթին միացած քաղաքացիներին առաջնորդում է «Հայաստան» խմբակցության պատգամավոր Աննա Գրիգորյանը։ Շեշտելով, որ Հայաստանն ու Արցախը պատմության ամենավճռորոշ փուլում են, պատգամավորը կոչ արեց լինել միասնական ու ոչ մի պարագայում չհանձնվել։
«Մեզնից հիմա առավել, քան երբևէ, պահանջվում է միասնական լինել արտաքին մարտահրավերները հաղթահարելու համար։ Բայց դրա համար, նախ և առաջ, պետք է հեռացնենք նրանց, ովքեր պատրաստակամություն են հայտնել Արցախը թողնել Ադրբեջանի կազմում, ովքեր պատրաստ են ամեն օր Սյունիքից, Գեղարքունիքից նոր տարածքներ զիջել թշնամուն։ Մենք դրան ասում ենք՝ ո՛չ։ Նիկոլն ու իր խմբակը պարտության տարան մեր ժողովրդին ու երկիրը, բայց մեզնից որևէ մեկը հանձնվելու իրավունք չունի»,-երթի ընթացքում լրագրողների հետ զրույցում ասաց Գրիգորյանը, ինչին երթի մասնակիցները միաձայն համաձայնվեցին։
Քայլերթը Տիգրանաշենից մեկնարկելու խորհուրդը, ինչպես նշեց պատգամավորը, վերահաստատելն է, որ այն, ինչպես միշտ հայկական եղել է, այնպես էլ մնալու է։
«Նիկոլն ու իր յուրայինները մեկ անգամ չէ, որ ասել են, թե, իբր, ՀՀ-ում կան ադրբեջանական անկլավներ՝ նկատի ունենալով նաև Տիգրանաշենը։ Տիգրանաշենն էլ մնալու հայկական, Տավուշի գյուղերն էլ,Սյունիքից էլ որևէ բան այլևս չի զիջվելու»,-նշեց Աննա Գրիգորյանն ու քաղաքացիներին կոչ արեց՝ միանալ քայլերթին։
Ինչպես երեկ հայտարարել էր ԱԺ փոխնախագահ, ՀՅԴ ԳՄ անդամ Իշխան Սաղաթելյանը, մայիսի 1-ին Երևանում լինելու է մեծ հանրահավաք, որին մասնակցելու են նաև Տիգրանաշենից և Տավուշից քայլերթով դեպի մայրաքաղաք շարժվող քաղաքացիները։