Կրթության, գիտության, մշակույթի եւ սպորտի նախարարության շենքի առջեւ նստացույց անող ՀՅԴ երիտասարդական միության անդամները չեն ցանկանում նախարար Արայիկ Հարությունյանի հետ որեւէ քննարկման մասնակցել:
«Սա համընդհանուր խնդիր է, սա ինչ-որ կուսակցության, քաղաքական ուժի խնդիր չէ: Հիմա մեկ օրակարգ կա՝ Արայիկ Հարությունյանի հրաժարականը, այդ մարդը վնասում է մեր կրթական համակարգը, մշակույթը, սպորտը, ինչպես կարողանում է՝ վնասում է: Լավ կլինի, որ էլ ավելի շատ մարդիկ միանան մեր կոչին: Մենք որեւէ մեկի հետ բանակցելու խնդիր չունենք, կարող ենք միայն հրաժարականի շուրջ բանակցել»,-երեկ ասել է ՀՅԴ երիտասարդական միության անդամ Արսեն Մարտոյանը:
Նշենք, որ նախօրեին նախարար Արայիկ Հարությունյանը լրագրողներին ասել էր, որ պատրաստ է խնդիրներն օրերով, ամիսներով քննարկել երիտասարդների հետ:
Հիշեցնենք, որ դաշնակցական երիտասարդները 5-րդ օրն է` նստացույց են անում նախարարությունների շենքի մոտ` պահանջելով Արայիկ Հարությունյանի պաշտոնաթողությունը: Արդեն 2 օր է նրանք եւ դասադուլ հայտարարած ուսանողները իրազեկման երթ են անցկացնում մայրաքաղաքում բուհերի ուսանողներին կոչ անելով միանալ իրենց:
Ավելի վաղ հայտնել էինք, որ ԵՊՀ հայ բանասիրության եւ պատմության ֆակուլտետների ուսանողները նոյեմբերի 6-ին դասադուլ են հայտարարել՝ բողոքելով նախարարության նախաձեռնած «Բարձրագույն կրթության մասին» օրինագծից, որով առաջարկվում է բուհերի ոչ մասնագիտական ֆակուլտետներում հայեցողական դարձնել այժմ պարտադիր համարվող՝ «Հայոց լեզու», «Հայ գրականություն» և «Հայոց պատմություն» առարկաների դասավանդումը: Դրան հաջորդող օրը երիտասարդ դաշնակցականները ԿԳՄՍ նախարար Արայիկ Հարությունյանի հրաժարականի պահանջով ակցիա անցկացրին կառավարության շենքի մոտ, այնուհետեւ երթով շարժվեցին դեպի նախարարությունների շենք եւ այնտեղ նստացույց հայտարարեցին: Նստացույցի մասնակիցների կարծիքով՝ Արայիկ Հարությունյանը պետք է հրաժարական տա, քանի որ նրա կառավարման շրջանում նախարարությունը վարում է ապազգային քաղաքականություն, առաջ քաշելով վիճահարույց «Բարձրագույն կրթության մասին» օրինագիծը, առաջարկելով դպրոցական ծրագրից հանել «Հայ եկեղեցու պատմություն» առարկան, ֆինանսավորելով «հակահայկական, սատանիստական» նախագծեր: Նրանց հատկապես զայրացրել է մեծ աղմուկ բարձրացրած՝ «ՀուԶանք ու Զանգ» ներկայացման համար նախարարությունից 2,7 միլիոն դրամ դրամաշնորհ տրամադրելու փաստը:
Արայիկ Հարությունյանը հայտարարել է, որ չի պատրաստվում հրաժարական ներկայացնել: