Ինչպես հիշում եք, օրերս բարձրաձայնել էինք արցախյան 44-օրյա պատերազմի մասնակից Հայկ Դանիելյանի խնդիրը:
Հայկը զորակոչվել է 2019 թվականի ամռանը, 6 ամիս ծառայել է Գյումրու հակատանկային ուսումնական զորամասում, այնուհետև տեղափոխվել է Հադրութի զորամաս: Մինչ հոկտեմբերի 28-ը կռվել է Հադրութում, հետո տեղափոխվել է Մարտունի 2-րդ, նոյեմբերի 2-ին իր գումարտակի հետ տեղափոխվել է Շուշի, որտեղ էլ կռվել է մինչև նոյեմբերի 9-ի փաստաթղթի կնքումը:
«Ես սերժանտի կոչում ունեմ, բանակում հակատանկիստ եմ եղել: 44-օրյա պատերազմի ժամանակ 12 միավոր տեխնիկա եմ խոցել, որից ինը՝ տանկ: Դրանից հետո հոկտեմբերի 4-ին բանավոր կերպով ինձ ասացին, որ Արցախի հերոսի կոչում են տվել, բայց պատերազմի վերջում իմացա, որ ոչ մի կոչում էլ չեն տվել: Ես ինքս չեմ լսել, բայց շատերն են ասել, որ պատերազմի օրերին ԱՀ նախագահ Արայիկ Հարությունյանը հեռուստատեսությամբ ուղիղ իմ անունը նշել է հերոսի կոչում ստացածների շարքում: Իմ ընտանիքի անդամները սոցցանցերով տեսել են իմ անունը: Հետո խոսակցություններ լսեցի, որ «Մարտական խաչ» են ցանկանում տալ, մարդիկ եկան-գնացին, ասացին, որ մինչև զորացրվելս կլուծեն խնդիրը, բայց այդպես էլ ոչ մի բան չփոխվեց. 2021 թվականի օգոստոսի 24-ին զորացրվեցի «Մարտական խաչ» 1-ին աստիճանի շքանշանով»,- 1or.am-ի հետ զրույցում պատմեց Հայկը:
Հայկի հարցի պատասխանն ստանալու ակնկալիքով մենք հարցում էինք ուղարկել ԱՀ նախագահ Արայիկ Հարությունյանի գրասենյակ: Մեր հարցմանն ի պատասխան ԱՀ նախագահի մամուլի քարտուղար Լուսինե Ավանեսյանը տեղեկացրեց, որ Նախագահականում տվյալ զինծառայողի վերաբերյալ որևէ նյութ չկա։
Հարցին` եթե նախագահականում տվյալներ չկան, արժե՞ շարունակել փնտրտուքը, քանի որ մեզ ՊԲ-ից էին ուղղորդել իրենց մոտ, Ավանեսյանը պատասխանեց, որ եթե ԱՀ նախագահի հրամանագրի մասին է խոսքը , ապա նման հրամանագիր չկա։