«Նովայա գազետա» անկախ թերթի գլխավոր խմբագիր Դմիտրի Մուրատովը երկուշաբթի աճուրդում 103,5 միլիոն դոլարով վաճառել է Խաղաղության նոբելյան մրցանակը՝ ոսկե մեդալը։ Նա գումարը փոխանցելու է Ուկրաինայում պատերազմի հետեւանքով տեղահանված երեխաներին։
Մեդալը վաճառվել է Նյու Յորքում, Heritage Auctions-ի կազմակերպած աճուրդում հեռախոսային սակարկությունների առայժմ անհայտ մասնակցին։
Մուրատովը մրցանակն ստացել էր 2021թ. ֆիլիպինցի լրագրող Մարիա Ռեսայի հետ միասին՝ «կարծիքի արտահայտման ազատությունը պաշտպանելու ջանքերի համար»։
Մուրատովը 1993թ. Խորհրդային Միության փլուզումից հետո «Նովայա գազետան» հիմնադրած լրագրողներից է։ Այս տարի պարբերականը միակ խոշոր թերթն է մնացել, որը քննադատում է նախագահ Պուտինին եւ նրա գործողությունները երկրի ներսում եւ նրա սահմաններից դուրս։
Մարտին «Նովայա գազետան» դադարեցրեց գործունեությունը Ռուսաստանում՝ այն բանից հետո, երբ երկրում ընդունվեց օրենք, որով բանտարկություն էր նախատեսվում բոլոր նրանց համար, ովքեր քննադատում են Կրեմլի ռազմական գործողությունը։
Ապրիլին Մուրատովի վրա հարձակում էր կատարվել գնացքում. նրա վրա ացետոնով խառնված յուղաներկ էին լցրել։
2000 թվականից «Նովայա գազետա»-ի վեց լրագրող եւ աշխատակից, այդ թվում Աննա Պոլիտկովսկայան, սպանվել են իրենց գործունեության պատճառով։