«Այս մի քանի տարվա փորձն ու գործընթացը ցույց տվեց, որ բազում անգամ այս շենքում աշխատանքից ազատվել են մասնագետներ, որոնք բազմաթիվ տարիների փորձ ունեն, իրենց լուման են ներդրել քաղաքի զարգացման մեջ և իրենց փոխարեն նշանակվել են ինչ-որ կադրեր, որոնք չունեն փորձ և ընդհանրապես չեն աշխատել այդ բնագավառներում»,-Երևանի ավագանու նիստում հայտարարեց «Բարգավաճ Հայաստան» խմբակցության անդամ Միքայել Մանրիկյանը:
Վերջինս հարցն ուղղեց քաղաքապետի խորհրդական Մերի Մարգարյանին, որը զեկուցում էր քաղաքապետարանի անձնակազմի կառավարման ստորաբաժանման կառուցվածքային փոփոխության հարցը:
«Այսինքն, ընտրողաբար հեռացվելու են այն կադրերը, որոնք անցանկալի՞ են և ընդունելու եք այնպիսիններին, որոնք ցանկալի՞ կադրեր են: Սկզբունքն ինչպե՞ս է լինելու: Ես կարող եմ բազմաթիվ օրինակներ բերել, երբ աշխատանքից ազատվել են փորձառու և ոլորտի գիտակ մարդիկ և այդ ոլորտում նշանակվել են, կակոյ նի բուձ, ոչ մասնագետներ»,-հայտարարեց Մանրիկյանը:
Մերի Մարգարյանը հայտնեց, որ համայնքային ծառայողը պաշտպանված է օրենքով և բոլոր ազատումները եղել են հիմնավորված:
«Բարգավաճ Հայաստան» խմբակցության ավագանու անդամն ասաց, որ պատասխանը արժանահավատ չէ, քանի որ բազմաթիվ միջոցներ կան մարդուն «տուպիկի մեջ դնելու» և աշխատանքից ազատելու համար:
Երևանի քաղաքապետ Հրաչյա Սարգսյանն էլ հայտարարեց, որ քաղաքապետարանից հեռացվելու են նրանք, որոնք չեն աշխատելու: