Օդի ջերմաստիճանը կլիմայական նորմայից բարձր է 5-7 աստիճանով, առկա է շատ բարձր կարգի հրեդեհավտանգ իրավիճակ հատկապես նախալեռնային և հովտային գոտիներում։ Այդ մասին այսօր մամուլի ասուլիսի ժամանակ հայտնեց Հիդրոօդերևութաբանության և մոնիտորինգի կենտրոնի պետի տեղակալ Գագիկ Սուրենյանը՝ հավելելով, որ դա պայմանավորված է նաև տևական ժամանակ տեղումների բացակայությամբ։
«Մինչև հուլիսի 21–ը Երևանում և Արարատյան դաշտում ջերմաստիճանը կտատանվի 38-40 աստիճան, լեռնային հատվածներում` մինչև 30-33 աստիճան։ Ջերմային ալիքի առկայությամբ պայմանավորված՝ ուլտրամանուշակագույն ճառագայթման ինդեքսի ինտենսիվությունը բավականին բարձր է նորմայից։ Ազգաբնակչությանը խորհուրդ ենք տալիս ժամը 11-17–ն ընկած հատվածում խուսափել արևի ուղիղ ճառագայթներից»,–նշեց Սուրենյանը։
Հանրապետության տարածք Արաբական թերակղզուց ջերմային ալիքը ներթափանցել է հուլիսի 10-ից և, բանախոսի խոսքով, շարունակվում է պահպանվել։
Սուրենյանը նաև նշեց, որ ջերմային ալիքը ավելի ինտենսիվացել է երեկ, ինչի հետևանքով ցերեկը Արարատյան դաշտում եւ Երեւանում գրանցվել է 40-41 աստիճան տաքություն:
«Հուլիսի 22-ից հետո այդ ջերմային ալիքը աստիճանաբար նահանջում է դեպի հարավ՝ իր տեղը զիջելով Սեւ ծովից եկող համեմատաբար սառը օդային հոսանքներին, որոնք այդքան էլ ինտենսիվ չեն: Ըստ կանխատեսումների՝ հուլիսի 22-25-ն ընկած ժամանակահատվածում ճերմաստիճանը 4-5 աստիճանով կնվազի եւ արդեն 23-24-ին ցերեկային ժամերին 38-40-ի փոխարեն կունենաք մինչեւ 34-35 աստիճան տաքություն, բայց տեղումներ չեն կանխատեսվում»,-եզրափակեց Գագիկ Սուրենյանը։