«Արմավիր քաղաքի հայ համայնքը շատ համախմբված է, մեր ձայնը լսելի է, և կարծում եմ՝ դա ոմանց կարող է դուր չգալ»,-այս մասին այսօր «Տեսակետ» մամուլի ակումբում, անդրադառնալով ՌԴ Արմավիր քաղաքում՝ հայկական եկեղեցու տարածքում, տեղադրված՝ Գարեգին Նժդեհի հուշատախտակը ռուս պատգամավոր Վինոգրադովի կողմից պղծվելուն, ասաց ՌԴ Արմավիր քաղաքի հայկական համայնքի նախագահ Գրիգորի Կարապետյանը:
«Հայատյացության մթնոլորտ եմ նկատում Արմավիրում: Օրեր առաջ ռուս-հայկական բարեկամությանը նվիրված հուշարձան էր բացվել, որի վրա հավերժության նշան կար, սակայն ոմանք դա ներկայացրել էին որպես հայկական արևախաչ, որը ցույց է տալիս, թե իբրև հայերը դրանով ցանկացել են ասել, թե իրականում ովքեր են Արմավիրի տերն ու տիրակալը: Այս պատճառով հայատյացության մթնոլորտ է տարածվել Արմավիրում, այնտեղ 2014-ից օրենքի ուժով չգործող Սլավոնական համայնք ՀԿ-ն դեռ որոշ ժամանակ առաջ պահանջում էր ապամոնտաժել հուշատախտակը՝ նշելով, որ Նժդեհը համագործակցել է ֆաշիստների հետ»:
Ըստ բանախոսի՝ վերոնշյալ կազմակերպությունն օգտագործել է Վինոգրադովին՝ նման դիրքորոշումն առաջ տանելու նպատակով, որն էր իրագործել է այդ ոտնձգությունը:
Անդրադառնալով այն հարցին, թե Վինոգրադովն ասել է, որ հայերն իրենք պիտի ապամոնտաժեին հուշատախտակը, և քանի որ չեն արել, ինքը նման քայլի է դիմել՝ Կարապետյանն ասաց, որ նման բան չկա, հայկական կողմը, բնականաբար, չի պատրաստվում ապամոնտաժել եկեղեցու տարածքում տեղադրված հուշատախտակը: Ի դեպ՝ այնտեղ ոչ միայն Նժդեհի հուշատախտակն է, այլև Անդրանիկի, Բաղրամյանի ու Բաբաջանյանի:
Ըստ Կարապետյանի՝ կոնկրետ Նժդեհի նկատմամբ նման հայտարարությունները տարածվել են Աշխաբադում ԱՊՀ երկրների գագաթնաժողովի ժամանակ Ալիևի՝ Նժդեհի մասին հայտարարություններ անելուց հետո
«Ես մի քանի անգամ հանդիպել եմ տեղի քաղաքային իշխանության հետ, դիմել եմ նրանց՝ խնդրելով տեղեկացնել մեզ, թե իրենք ինչպես են դիտում՝ ո՞վ է իրենց կարծիքով Նժդեհը, բայց առայժմ ոչ մի պատասխան չեմ ստացել»,-ասաց Կարապետյանը և հավելեց, որ հենց վերադառնա Արմավիր, դիմելու է համապատասխան մարմիններին՝ այս գործով զբաղվելու համար:
Հայ համայնքի նախագահը նշեց, որ Հայաստանի իշխանություններից ակնկալում և խնդրում է տեղի ունեցածի վերաբերյալ կոշտ արձագանք:
Հիշեցնենք, որ Ռուսաստանի Արմավիր քաղաքում՝ հայ առաքելական եկեղեցու տարածքում, գրանցվել է վանդալիզմի դեպք: Օրերս Արմավիրի պատգամավոր Ալեքսեյ Վինոգրադովը մտել է եկեղեցու տարածք և սև ներկով ներկել է Հայաստանի ազգային հերոս Գարեգին Նժդեհի հուշատախտակը. այդ մասին նոյեմբերի 12-ին հայտնել է հենց Ալեքսեյ Վինոգրադովը:
Այս քայլը նա բացատրել է այն հանգամանքով, որ նոյեմբերի 11-ին լրացել է երկշաբաթյա ժամկետը, որի ժամանակ տարածաշրջանային և տեղական իշխանությունները, ինչպես նաև «Ռուսաստանի հայերի միության» անդամները խոստացել էին ապամոնտաժել Նժդեհի հուշատախտակը:
Ավելի վաղ Վինոգրադովը հայտարարել էր, որ եթե հարցը լուծում չգտնի, ինքն անձամբ կանի դա:
Մանրամասները՝ տեսանյութում