Երևան քաղաքի ընդհանուր իրավասության դատարանում, դատավոր Մնացական Մարտիրոսյանի նախագահությամբ, շարունակվում է «Համախմբում» շարժման անդամ, հասարակական-քաղաքական գործիչ Ավետիք Չալաբյանի գործով դատաքննությունը։
Նիստի սկզբում Ավետիք Չալաբյանը հայտարարեց, որ երեկ անցել է բժշկական ստուգում, ախտորոշվել է հիպերտենզիա 3-րդ աստիճանի, նշանակվել է սրտաբանի վերահսկողությամբ ամբուլատոր բուժում։
«Դատական նիստերին կհաճախեմ, բայց չեմ բացառում, որ կարող է նիստերի ընթացքում վիճակս վատանա, քանի որ 3-րդ աստիճանի հիպերտենզիայի դեպքում կարող է հիպերտոնիկ կրիզ առաջանալ։ Երբ զգամ վիճակս վատանում է, տեղյակ կպահեմ դատարանին, թույլտվություն կհայցեմ, որպեսզի դատական նիստը հետաձգվի»,- նշեց Ա. Չալաբյանը։
Դատավոր Մնացական Մարտիրոսյանն ասաց, հենց խնդիրն առաջանա, անմիջապես կդադարեցնեն նիստը. «Անհոգ եղեք»։
Հիշեցնենք, որ նախորդ՝ օգոստոսի 1-ի նիստում, Չալաբյանի պաշտպանները դատավոր Մարտիրոսյանին ինքնաբացարկի միջնորդություն ներկայացրին, որը մերժվեց։
Նշենք, որ Չալաբյանը մեղադրվում է ընդդիմության ցույցերին մասնակցելու նպատակով ուսանողներին նյութապես շահագրգռելու մեջ։
Նա մայիսի 14-ին կալանավորվեց, ապա կալանքը երկարացվեց եւս 15 օրով։ Հուլիսի 27-ի երեկոյան Ավետիք Չալաբյանն ազատ արձակվեց «Արմավիր» քրեակատարողական հիմնարկից։
Մեղադրական եզրակացության համաձայն. «Ավետիք Չալաբյանին մեղադրանք է առաջադրվել այն բանի համար, որ նա 2022 թվականի մայիսի 4-ին Երևան քաղաքի Աբովյան 12 հասցեում գտնվող՝ «Դալան» ռեստորանում, այնուհետև մայիսի 08-ին՝ Հայաստանի ազգային ագրարային համալսարանի ուսանողական խորհրդի սենյակում նշված համալսարանի ուսանողական խորհրդի նախագահ Թոռնիկ Ալիյանին և նրա միջոցով Հայաստանի ազգային ագրարային համալսարանի ուսանողական խորհրդի անդամներին ու համալսարանի ուսանողներին ՀՀ-ում «Դիմադրություն» և «Համախմբում» շարժումների հավաքներին՝ անհնազանդություններ, բողոքի ակցիաներին, ցույցերին, փողոցներ փակելու գործողություններին մասնակցելու նպատակով դիտավորությամբ նյութապես շահագրգռել է՝ առաջարկելով 2.000.000 ՀՀ դրամ գումար»: