Այս իշխանություններն ամեն ինչ անում են, որպեսզի արգելվի իշխանությունների դեմ բողոքելը, իրենց կարճ խելքով փորձում են վախեցնել այն մարդկանց, որոնց համար առաջնային է հայրենիքը, ովքեր կամավոր մեկնել են հայրենիքը պաշտպանելու, անգամ՝ կյանքի գնով:
Այս մասին ԱԳՆ շենքի դիմաց ընդդեմ սփյուռքահայերի Հայաստան մուտք գործելու ապօրինի արգելքի բողոքի ակցիայի ժամանակ ասաց ԱԺ պատգամավոր, դաշնակցական Քրիստինե Վարդանյանը:
«Իշխանություններն այսպիսով սեպ են խրում Հայաստան-Սփյուռք հարաբերությունների միջև, որը, հատկապես այսօրվա պայմաններում, անթույլատրելի շքեղություն է, սա այլ բացատրություն, քան թշնամու օրակարգը սպասարկելը, չունի»,-ասաց նա:
ՀՅԴ-ական Մուրադ Փափազյանի մուտքը արգելելու դեպքում վարչապետի աշխատակազմը պարզաբանել էր, որ նրա մուտքը արգելվել է Ֆրանսիայում՝ ընդդեմ Նիկոլ Փաշինյանի բողոքի ակցիային մասնակցելու համար:
Անդրադառնալով սրան՝ Քրիստինե Վարդանյանն ասաց, որ սա վկայում է տարրական քինախնդրության և վրեժխնդրության մասին.
«Իրենք Նիկոլ Փաշինյանին նույնականացրել են պետության հետ, նրան սրբություն են դասել ու նրա դեմ բողոքել չի կարելի, այդ ե՞րբվանից ու ո՞ր օրենքով է նման կարգավորում գործում Հայաստանում»,-ասաց Վարդանյանը: