Միջանցքը տեղափոխվելու է դեպի հարավ և այդ նոր միջանցքով անցնելու է նոր երթուղին։ Ենթադրվում է, որ սեպտեմբերի առաջին շաբաթվա ընթացքում կտեղափոխվենք նոր երթուղի։ Այդ մասին Արցախի հանրային հեռուստատեսության «Օր» լրատվականի հետ զրույցում ասել է Արցախի ՏԿԵ նախարար Հայկ Խանումյանը։
«Այդ երթուղով եթևեկությունը կսկսվի, երբ խաղաղապահների բոլոր անցակետերը կտեղափոխվեն այնտեղ և ժամանակավոր՝ 4,8 կմ-ոց հատվածը պատրաստ կլինի։ Այդ հատվածի մի մասն արդեն ասֆալտապատ է․ մոտ օրերս կավարտվի։ Ենթակառուցվածքների տեղափոխման հարցը շարունակվում է․ կապի հարցը լուծված է, էլեկտրագծերի տեղափոխման համար դեռ ժամանակ է պետք, իսկ գազի հետ կապված, ինչպես ասել եմ, այլ լուծումներ պետք է փնտրել»-աղբյուրի փոխանցմամբ՝ ասել է Խանումյանը։
Նշենք, որ Բերձորը, Աղավնոն ու Ներքին Սուսը շրջանցող նոր երթուղու ժամանակավոր՝ 4,8 կմ-ոց հատվածը, միանում է Աղավնո-Տեղ գործող ճանապարհին՝ Աղավնոյից մոտավորապես 3 կմ անց։