2024թ․ ձմեռային զորակոչին կներգրավվեն նաև կանայք։ Այդ մասին Կառավարության այսօրվա նիստում հայտարարեց Փաշինյանն ու պաշտպանության նախարարին հրահանգեց՝ բոլոր ռեսուրսները ներդնել, որ ձմեռային զորակոչին նախատեսված թվով զորակոչիներ լինեն։
Պաշտպանության նախարար Սուրեն Պապիկյանի արձագանքը, որ հիմա նախապատրաստում են ավագ դասարանների աշակերտներին, ուստի կանանց մասով հիմնական ակնկալիքը լինելու է ամառային զորակոչին, վարչապետին դուր չեկավ։
«Առաջարկում եմ ամռան մասին մոռանալ, քանի որ հիմա աշուն է և առաջիկայում ձմեռային զորակոչն է։ Ամենայն լրջությամբ պետք է մոտենալ այս հարցին և հիշել, որ բանակում չկա կին կամ տղամարդ, բանակում կա զինվոր»,-շեշտեց Փաշինյանը։
Պապիկյանն, ըստ այդմ, ավելացրեց, որ պատրաստ են նաև ձմեռային զորակոչին ընդունել 18-27 տարեկան իգական սեռի քաղաքացիներին։
Այսօր Գործադիրում հավանության արժանացած նախագծով նախատեսվում է սահմանել կամավոր հիմունքներով պարտադիր զինվորական ծառայություն անցնելու դիմում ներկայացրած իգական սեռի քաղաքացիներին պարտադիր զինծառայության գործընթացի հետ կապված հարաբերությունները։
«Նախագիծն այն մասին է, որ մենք կարողանանք իրականցնել հաշվառման ու կարգավորման հարցեր»,-նշեց Պապիկյանը։
Փաշինյանն էլ հիշեցրեց, թե ինչ է նշանակում կամավոր սկզբունքով պարտադիր զինվորական ծառայություն անցնել՝ 6-ամյա ժամկետում և ավելացրեց՝ ծառայության վերջում 1 մլն դրամ կստանան կանայք։
Պարտադիրն անցնելուց հետո կանայք կարող են նաև պայմանագրային հիմունքով շարունակել ծառայությունը՝ «Պաշտպան հայրենյաց» ծրագրով, 5 տարի ժամկետով։