Ցանկացած հայի համար Արցախի կորստի մասին մտածելն իսկ սարսափելի է, ուր մնաց՝ լինել ժամանակակիցը այնպիսի իրողությունների, որոնք մղձավանջներում նույնիսկ չէինք պատկերացնի: Սակայն արդեն իսկ փաստ է, որ Արցախն այլևս թշնամու ձեռքին է: Ոչ ոք ու ոչինչ չի կարող սփոփել այն անասելի ցավը, որ զգում է յուրաքանչյուր հայորդի:
21-րդ դարում, քաղաքակիրթ աշխարհի աչքերի առջև հայրենազրկվեց ու ցեղասպանվեց մի ողջ ժողովուրդ: Ինչպես կասեր մեծն Սիամանթոն՝ «Ո՜վ, մարդկային արդարություն, թող ես թքնե՛մ քու ճակատիդ»:
Հավանաբար շատերս «տաք գլխով» դեռ չենք գիտակցում տեղի ունեցածի ողջ ողբերգությունը, սակայն հուսանք, որ այս ամենը ժամանակավոր է. հայ ազգն իմաստուն է, մեր հայրենասերների, տաղանդավոր երիտասարդների, հողին իրապես տեր կանգնող նվիրյալների շնորհիվ մի բարի օր անպատճառ կվերադարձնենք Արցախ աշխարհը…
Սիրելի՛ հայրենակիցներ, մենք այժմ թևաթափ լինելու և հուսահատության գիրկը նետվելու իրավունք ու ժամանակ չունենք. Արցախից բռնի տեղահանված մեր հայրենակիցներն աղետի մեջ են, նրանց օգնություն է անհրաժեշտ:
«Հաճըն» հայրենակցական միությունը՝ հանձին իր ատենապետ, «Տեսակետ» մամուլի ակումբի ղեկավար, Tesaketinfo.am կայքի գլխավոր խմբագիր Հովհաննես Գրիգորյանի՝ դիմում է բոլոր հաճընցիներին, հայրենակցական միություններին ու պարզապես՝ բոլոր սրտացավ մարդկանց՝ խնդրելով և հորդորելով օգնության ձեռք մեկնել մեր եղբայրներին ու քույրերին՝ ով ինչով կարող է. շնորհակալ կլինենք ցանկացած օգնության համար, կարևորը անտարբեր չլինելն է:
Նրանք այս օրերին ունեն հագուստի, անկողնային ու հիգիենայի պարագաների, դեղորայքի, մանկական կերերի, չոր սննդի կարիք: Խնդրում ենք համապատասխան իրերը բերել Մամուլի շենք, 13-րդ հարկ, «Հաճըն» հայրենակցական միության գրասենյակ, որտեղից դրանք կբաշխվեն կարիքավոր արցախցիներին:
Գալուց առաջ, ինչպես նաև լրացուցիչ հարցերի դեպքում խնդրում ենք զանգահարել 077 400-955 հեռախոսահամարով:
Մեր ուժը միասնության մեջ է, ուրեմն՝ լինենք համախմբված և գործենք՝ հանուն մեր բազմաչարչար հայրենակիցների:
2023թ, հոկտեմբեր 1
«Հաճըն» հայրենակցական միություն