Սառնաղբյուր գյուղում սպանվել է 5 քաղաքացիական անձ, այդ թվում՝ երեք երեխա։ Ասկերանի Սառնաղբյուր գյուղում սպանված երեք անչափահասներն էլ դպրոցում են եղել։ Երեխաներից երկուսը մեկ ընտանիքից էին՝ ութամյա և տասնամյա եղբայրները։ Այս մասին հրավիրված մամուլի ասուլիսին ասաց ՀՀ նախկին ՄԻՊ, «Թաթոյան» հիմնդրամի ղեկավար Արման Թաթոյանը։
Քարտեզներով ներկայացնելով ադրբեջանցիների հարձակման ուղղությունները` Թաթոյանն արձանագրեց, որ ադրբեջանական զինծառայողները շղթայի մեջ են վերցրել բնակավայրերը, նրանք, ովքեր չեն հասցրել դուրս գալ գյուղերից, կա’մ գերեվարվել են, կամ սպանվել, հետևաբար կամովի տներից հեռանալու մասին խոսք չկա։
«Եթե ինչ-որ մեկը չի հասցրել փախչել, սպանվել կամ գերվել է, օրինակ, Գետավանում խաղաղ բնակիչների սպանության, վիրավորումների, գերեվարման դեպքեր կան»,- ընդգծեց Թաթոյանը։
Նրա խոսքով՝ բնակչությունը փախչելու համար ուներ կես ժամից մեկ ժամ, և ընդհանուր պատկերը ցույց է տալիս, որ ադրբեջանական զորքերը բնակչությանը պարզապես քշել են մի անկյուն և տարածքից «ելք»-ի մղել, ինչ կամավոր ելքի մասին է խոսքը։
Անդրադառնալով Ստեփանակերտի մեկուսացմանը՝ Թաթոյանն ընդգծեց, որ դա ռազմավարական նշանակություն ուներ ադրբեջանական իշխանությունների համար։