Առաջիկա մի քանի շաբաթները վճռորոշ են լինելու Հայաստանի և Ադրբեջանի միջև խաղաղության համաձայնագրի կնքման գործընթացի համար։ Նման կարծիք է հայտնել ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ՛Բրայենը, փոխանցում է ՏԱՍՍ-ը։
«Առաջիկա մի քանի շաբաթները վճռորոշ կլինեն՝ ստուգելու կողմերի պատրաստակամությունը՝ մտադրություններից համաձայնության անցնելու համար, քանի որ, ինչպես գիտենք, «այո»-ն այն բառն է, որին ամենադժվարն է հասնել բանակցություններում», – ասել է դիվանագետը ԱՄՆ Ներկայացուցիչների պալատի արտաքին հարաբերությունների հանձնաժողովում «Լեռնային Ղարաբաղի ապագան» թեմայով լսումների ժամանակ։
Ջեյմս Օ՛Բրայենի խոսքով՝ ամերիկյան վարչակազմը կարծում է, որ Ադրբեջանի և Հայաստանի միջև խաղաղ համաձայնագրի ելքը ներկայումս կախված է Բաքվից։
«Թվում է, թե նա (Նիկոլ Փաշինյանը) պատրաստ է ռիսկի գնալ հանուն խաղաղության։ Իրական հարցն այն է, թե արդյո՞ք նախագահ Ալիևը պատրաստ է անել նույնը, և նա ասել է, որ պատրաստ է», – ասում է ԱՄՆ արտաքին քաղաքական գերատեսչության ներկայացուցիչը: