Նախ, Հայաստանի իշխանությունների մի շարք ներկայացուցիչներ այս իրավիճակը համարում էին քաղաքական ճնշում, սակայն Հայաստանի իշխանությունների մի շարք ներկայացուցիչներ էլ այդպես չէին կարծում: Հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Վերին Լարսի անցակետում Հայաստանի արտահանման հետ կապված իրավիճակը։
«Երկրորդ կետը, որը վկայում է, որ դա ամբողջ երկրի և հատկապես Հայաստանի ողջ քաղաքական իսթեբլիշմենթի կարծիքը չէ, այն է, որ վերջերս խորհրդակցություններ են տեղի ունեցել Եվրասիական տնտեսական հանձնաժողովի միջոցով և Ռուսաստանի և Հայաստանի համապատասխան գերատեսչությունները երկխոսել են հենց այն հարցերի շուրջ, որոնք ծագել են հայ գործընկերների շրջանում՝ կապված «Վերին Լարս» բազմակողմ ավտոմոբիլային անցակետով ապրանքների տեղափոխման, ինչպես նաև հայկական գյուղմթերքի մատակարարման հետ։
Հանդիպումները կրել են առարկայական և կառուցողական բնույթ, երկուստեք քննարկվել են մի շարք միջոցառումներ՝ փոխընդունելի լուծումներ գտնելու համար։ Կան և եղել են մեխանիզմներ, որոնք կարող են և պետք է կիրառվեն խնդիրների դեպքում, ինչպես հիմա է արվում»,-նշել է ՌԴ ԱԳՆ ներկայացուցիչը։
«Սակայն հենց այն ներկայացուցիչների շարքը, որոնք կարծում են, որ իրենց վրա քաղաքական ճնշում է գործադրվում, պետք է կարդան հայկական ԶԼՄ-ները և մտածեն, թե արդյոք Ռուսաստանի ներկայացուցիչների վրա նույն քաղաքական ճնշումը չի գործադրվում վիրավորանքների, կեղծ լուրերի, ապատեղեկատվության և այլնի միջոցով: Ուրիշներին մեղադրելուց առաջ՝ միշտ արժե նայել հայելու մեջ»,-ասաց նա:
Ավելի վաղ Panorama.am կայքը հարցում էր ուղարկել ՌԴ ԱԳՆ՝ Վերին Լարսի անցակետում հայկական բեռնատարների հետ կապված իրավիճակի հետ կապված։
Մարիա Զախարովան նաև նշել է, որ Ռուսաստանը ողջունում է Ադրբեջանի և Հայաստանի ներկայացուցիչների հանդիպումը սահմանների սահմանազատման վերաբերյալ։
«Մեր կողմից պատրաստ ենք անհրաժեշտ աջակցությունը ցուցաբերել անմիջական սահմանազատման աշխատանքների ընթացքում։ Սա ենթադրում է նաև անհրաժեշտ քարտեզագրական նյութերի ապահովում։ Մասնավորապես, դա երեկ հաստատել է ՌԴ ԱԳ նախարար Սերգեյ Լավրովը մերձկասպյան հինգ պետությունների նախարարների խորհրդի շրջանակում իր ադրբեջանցի գործընկերոջ հետ հանդիպմանը»,-ասել է Զախարովան։
Ինչ վերաբերում է տրանսպորտային հաղորդակցությունների ապաշրջափակման եռակողմ աշխատանքային խմբին, Զախարովայի խոսքով, դրա շրջանակներում զգալի առաջընթաց է գրանցվել։
«Եթե երկու կողմից էլ լինի քաղաքական կամք, մենք կարող ենք արագ ավարտին հասցնել կոնկրետ նախագծերի համաձայնեցման աշխատանքները և ծավալել առարկայական գործունեություն։ Մենք կարծում ենք, որ եռակողմ աշխատանքային խմբի շրջանակներում պայմանավորվածությունների ձեռքբերման հետագա ձգձգումը կգործի տարածաշրջանի երկրների, այդ թվում՝ Հայաստանի շահերի դեմ»,-ասել է Զախարովան։
Ինչպես նշել է ռուս դիվանագետը, Ռուսաստանը Հայաստանին և Ադրբեջանին հրավեր է ուղարկել Մոսկվայում խաղաղության պայմանագրի վերաբերյալ հանդիպմանը կամ այն անցկացնել երրորդ երկրներում բազմակողմ միջոցառումների շրջանակում։
«Բաքուն մեզ միշտ հաստատել է բանակցություններ վարելու պատրաստակամությունը։ Ցավոք, նույնը չենք կարող ասել մեր հայ գործընկերների մասին։ Միգուցե նրանք հավատում են, որ Վաշինգտոնից, Բրյուսելից, Փարիզից իրենց նոր խորհրդականները կկարողանան ավելի հետաքրքիր, ավելի լավ, ավելի արդյունավետ բան առաջարկել»,-ասաց նա։
«Ուրիշ ինչքա՞ն և որտե՞ղ պետք է իրենց դրսևորեն արևմտյանները, որպեսզի հասկացնեն, որ երբեք չեն գործելու այլ երկրների ժողովուրդների շահերից, նրանք միշտ գործում են իրենց շահերից ելնելով, և պետք է, որ բոլոր մյուս երկրները գիտակցեն բացառապես սեփական շահերը»,-ասել է Զախարովան: