Ազգային անվտանգության նախկին նախարար Դավիթ Շահնազարյանը պնդում է, որ ղարաբաղյան բանակցությունները մտել են փակուղի: «Հայաստանի նոր իշխանությունների հակասական հայտարարությունները Ղարաբաղի հիմնախնդրով բանակցային գործընթացը փակուղի են մտցրել: Օրինակ՝ Բաքուն ասում է, որ փաստաթուղթ կա, իսկ Երևանն ասում է՝ չկա: Այսօր Ադրբեջանն ու միջազգային հանրությունը մի դիրքորոշում ունեն, իսկ Հայաստանը՝ այլ, ինչի մասին 2 անգամ խոսել է Ռուսաստանի ԱԳ նախարար Սերգեյ Լավրովը», -այսօր «Վերնատուն» ակումբի նիստում հայտարարեց Շահնազարյանը:
Վերջինը, հիշեցնենք՝ ՀՀՇ-ի անդամ էր, նախորդ տարի Հանրապետական կուսակցության կազմով մասնակցեց խորհրդարանական ընտրություններին, բայց ձայներ չստացավ:
Շահնազարյանի խոսքով, Ադրբեջանն արդեն լուրջ փաստարկներ է ստացել ապագա ռազմական գործողությունների արդարացման համար: «Այս ամենը կարող է հանգեցնել նրան, որ որևէ միջազգային միջոցառման ժամանակ բանակցությունների սեղանին կարող է հայտնվել մեզ համար անընդունելի փաստաթուղթ, որի վրա մենք առավելագույնը կարող ենք վետո կիրառել և ստանալ «Լիսաբոն 2»: Բացառված չէ, որ առաջիկայում այդպիսի փորձ է իրականացվելու Բրատիսլավայում»,- ընդգծեց նա:
Քաղաքական գործիչը հիշեց 2018 թվականի մայիսը և նկատեց, որ այդ ժամանակ բանակցությունների սեղանին միայն մեկ հարց կար՝ ամբողջ շփման գծում միջոցառումներ իրականացնելու մասին:
«Ի դեմս ԵԱՀԿ Մինսկի խմբի համանախագահների՝ կային միջազգային հանրության երեք նախաձեռնություններ՝ ամբողջ շփման գծում հատուկ սարքերի տեղադրում, ԵԱՀԿ դիտորդական առաքելության ընդլայնում, հրադադարի ռեժիմի խախտումների կանխման մեխանիզմների ստեղծում: Ստացվում է, որ օրակարգում էր միջազգային տարրերի ներդրման հարցը, սա մեզ համար չափազանց ձեռնտու էր: Այս օրակարգը կար արդեն 2014 թվականից, իսկ 2016 թվականի ապրիլյան պատերազմից հետո դարձավ միակը»,- ասաց Շահնազարյանը:
Նա վերլուծել է ու պարզել, որ Հայաստանի իշխանությունների նոր բանակցային կետը հիմնված է այն հանգամանքի վրա, որ ինքնորոշման սկզբունքի մասին չի խոսվում, և անգամ եթե խոսվում է, ապա դրան հաջորդում են այդ սկզբունքին հակասող հայտարարություններ: «Խոսք չկա նաև 3 սկզբունքների մասին, և դրանք, ըստ էության, մերժվում են: Ինքնորոշման սկզբունքը պետք է դրվի բանակցությունների հիմքում, և պետք է բացառել դրան հակասող ցանկացած հայտարարություններ, օրինակ՝ «լուծումը պետք է ընդունելի լինի նաև Ադրբեջանի համար», կամ «Արցախը Հայաստան է, և վերջ», կամ «պետք է հանրաքվե անցկացնել»»,- ներկայացրեց Շահնազարյանը:
Գործիչը ընդգծեց, որ հայ ժողովրդի համար կարևորը պետք է լինի Արցախի Հանրապետության միջազգային ճանաչման գործընթացը, քանի որ դա ամբողջ ժողովրդի անվտանգության հարցն է: