mediahub.am-ը գրում է.
Կառավարության այսօրվա նիստի չզեկուցվող հարցերից մեկով տարածքային կառավարման և ենթակառուցվածքների նախարար Գնել Սանոսյանն առաջարկելու է 2000 թվականի արտադրության Mercedes-Benz մակնիշի մեքենա նվիրել Արագածոտնի մարզի Թալին համայնքին։
Որոշման մեջ նշված է․ «Հայաստանի Հանրապետության տարածքային կառավարման և ենթակա¬ռուցվածքների նախարարության պետական գույքի կառավարման կոմիտեին (այսուհետ՝ կոմիտե) ամրացված, 131 610 դրամ սկզբնական արժեքով «MERCEDES-BENZ 814 D» մակնիշի (թողարկման տարեթիվը՝ 2000 թվական, նույնացման համարը՝ WDB6703731N096681) տրանսպորտային միջոցը նվիրել Հայաս¬տանի Հանրապետության Արագածոտնի մարզի Թալին համայնքին։
Մեքենան 21 տեղանոց միկրոավտոբուս է, որը նվիրում են Թալին համայնքին, որ Թալինի համայնքապետարանի աշխատակիցներին համայնքի բնակավայրերից աշխատանքի տեղափոխեն դրանով։
Հետաքրքիր է, որ կառավարությունը «հազար» տարվա մեքենաները խոտանելու կամ օտարելու փոխարեն որոշում է ուղարկել «գյուղի բարեկամներին», որ իրենց հնամաշ գույքով «յոլլա գնան», մինչդեռ 24 տարվա հնության միկրոավտոբուսը, որով տասնյակ ուղևորներ են տեղափոխելու, կարող է անվտանգության լուրջ խնդիրներ առաջացնել նրանց կյանքի և առողջության համար, էլ չենք ասում, որ հնամաշ տեխնիկան կարող է ուղղակի ամեն օր խափանվել՝ լրացուցիչ ծախս և հոգս առաջացնելով համայնքի համար։
Բայց կառավարությունը, որ գումար ունի Նիկոլ Փաշինյանի տիկնոջ համար ավտոսրահից 150 հազար դոլար արժողությամբ շքեղ Lexus LX500 ձեռք բերել, որ տիկինը գերհարմարավետ պայմաններով երթևեկի, ափսոսում է մի քանի միլիոն դրամ տա՝ համայնքների համար նոր ավտոբուս ձեռք բերի, որ շարքային հպարտ քաղաքացիներն էլ հարմարավետ ու անվտանգ փոխադրամիջոցով երթևեկեն։ Ու որոշում է բավարարվել ընդամենը 131 հազար դրամանոց (ոչ թե դոլարանոց) հնամաշ և ուրիշի «չլած» միկրոավտոբուսը Թալին համայնքին «նվիրելով», եթե դա նվեր կարելի է համարել։