«Բացի բացառիկ հայ լինելը, հայրս բացառիկ հայր է, թիկունք, որի մասին միայն երազել կարելի էր։
Անչափ մեծ սիրով ու կարոտով, արցունքներս խեղդելով ուզում եմ խոստանալ, որ ամեն բան կանենք, որ իր արածը կիսատ չմնա շարունակվի ու անմահանա։
Չնայած, որ երկար չապրեց, բայց ապրեց խիտ ու բոլորի համար չափազանց կարևոր կյանք»,- ֆեյսբուքյան էջում գրել է «Կարին» ավանդական երգի-պարի խմբի հիմնադիր և գեղարվեստական ղեկավար, Հայաստանի մշակույթի վաստակավոր գործիչ և Արցախյան պատերազմի մասնակից Գագիկ Գինոսյանի դուստրը՝ Ծովինար Գինոսյանը։ 
Հիշեցնենք, որ նախօրեին 58 տարեկանում մահացել է Գագիկ Գինոսյանը։ «Հայրիկն այսօր ցերեկը
վատ է զգացել, տարել են «Աստղիկ» ԲԿ, որտեղ վիճակը փոքր ինչ բարելավել է, հետո բայց էլի վատացել է, և բժիշկներին չի հաջողվել փրկել նրա կյանքը», – այս մասին Yerkir.am-ին ասել էր Ծովինար Գինոսյանը։
Ծովինարը նաև հոր խոսքերից է մեջբերում արել. «Ես կյանքում երբևէ չհեգնեցի ոչ մեկին, քանզի հեգնանքը իմ տեսակը չէ։ Բայց և այնպես կուզեի կյանքում մի անգամ հեգնել և միայն… Երբ մահը կնայի աչքերիս մեջ:
Հեգնել մահը… այդպես կարելի է գոնե չպարտվել մահվանը։
Հեգնել, անգիտանալ մահը. այդպես է ծնվում անմահությունը։
Գագիկ Գինոսյան»։
Գագիկ Գինոսյանը ծնվել է 1966 թվականի օգոստոսի 3-ին Վրաստանի Ախալցխա քաղաքում։ 1972-1982 թվականներին սովորել է Ախալցխայի №3 հայկական միջնակարգ դպրոցում։ 1982-1983 թվականներին աշխատել է Ախալցխայի Շարժական մեխանիզացված շարասյունում որպես բանվոր։ Նույն թվականին ընդունվել է Երևանի պոլիտեխնիկական ինստիտուտի «Տեխնիկական կիբեռնետիկա» ֆակուլտետի «Ավտոմատիկա և հեռուստամեխանիկա» բաժինը և ավարտել այն 1990 թվականին։
Մասնակցել է Արցախյան պատերազմին։ Եղել է Լեոնիդ Ազգալդյանի հրամանատարությամբ գործող «Ազատագրական բանակ» ջոկատի ռազմիկ, ապա 1992 թվականի օգոստոսին ընդգրկվել է «Արծիվ մահապարտներ» հատուկ նշանակության գումարտակում։
Մասնակցել է Մարտակերտի, Ասկերանի, Մարտունու, Լաչինի, Քելբաջարի ազատագրական մարտերին։
Զինադադարից հետո՝ 1994 թվականից ծառայել է ՀՀ զինված ուժերում որպես սպա։
1994-1996 թվականներին ծառայել է ՀՀ ԶՈՒ հատուկ նշանակության առանձին գումարտակում։ 1995-1996 թվականներին սովորել և ավարտել է Մոսկվայի մարշալ Շապոշնիկովի անվան դաշտային Ռազմական ակադեմիան՝ ստանալով գնդի և բրիգադի հրամանատարի որակավորում։ 1996 թվականին զորացրվել է ՀՀ ԶՈՒ շարքերից։
Գագիկ Գինոսյանն 1987 թվականից սկսել է պարել Հայրիկ Մուրադյանի ստեղծած «Վան» ազգագրական խմբում։ 1987-2001 թվականներին «Վան», «Անդովկ», «Ակունք» խմբերի համերգային ծրագրերի շրջանակներում մասնակցել է արտերկրյա մի շարք շրջագայությունների և դարձել 4 տարբեր միջազգային փառատոնների դափնեկիր՝ 1996 թվականից Իտալիայի Լիկատա քաղաքում երրորդ միջազգային և Պիետրապերցիա քաղաքի փառատոններում, 1999 թվականին Ռումինիայի Յասսի քաղաքում հինգերորդ միջազգային «Կատալինա» և Խորվաթիայի Կառլովաց քաղաքում՝ ՅՈՒՆԵՍԿՕ-ի նշանաբանի տակ անցկացվող երկրորդ միջազգային փառատոններում։
Գագիկ Գինոսյանը 2001 թվականին հիմնադրել է «Ծովակ» և «Կարին» ավանդական երգի-պարի խմբերը։
2011 թվականին Գագիկ Գինոսյանի ղեկավարած «Կարինը» Հայաստանի Հանրապետությունը ներկայացնելով Իսպանիայում 1985 թվականից ի վեր անցկացվող ազգային պարերի 14-րդ համաշխարհային մրցույթ-փառատոնին՝ պարերի անվանակարգում զբաղեցրել է առաջին տեղը, իսկ երաժշտական նվագակցության անվանակարգում նվաճել է երրորդ մրցանակը, ինչի համար ՀՀ Մշակույթի նախարարությունը Գ.Գինոսյանին «ազգային պարարվեստի զարգացման և տարածման գործում ունեցած զգալի ավանդի համար» պարգևատրվել է ՀՀ Մշակույթի նախարարության Ոսկե մեդալով։՚
«Տեսակետ »մամուլի ակումբը և «Հաճն» հայրենակցական միությունը ցավակցում են Գագիկ Գինոսյանի ընտանիքին, կիսում նրանց ցավը։