Ադրբեջանում պահվող գերիների, պատանդների, պահվող անձանց վերադարձի ուղղությամբ ամենօրյա աշխատանք է տարվում։ Այս մասին ասուլիսում հայտարարեց Նիկոլ Փաշինյանը՝ անդրադառնալով Ադրբեջանում գերության մեջ գտնվող Արցախի ռազմաքաղաքական ներկայացուցիչներին։
Լրագրողը, մասնավորապես, հիշեցրեց, որ ԼՂ-ում ձերբակալված և Ադրբեջան տեղափոխված Արցախի նախկին նախագահները, ռազմաքաղաքական պաշտոնյաները շարունակում են գտնվել Բաքվում։ Լրագրողը հետաքրքրվեց՝ ինչ քայլեր են ձեռնարկվում նրանց Հայաստան կամ երրորդ երկիր տեղափոխելու ուղղությամբ, արդյո՞ք կան բանակցություններ։
Փաշինյանը հայտարարեց, որ Ադրբեջանում պահվող հայ գերիների վերադարձի ուղղությամբ ամենօրյա աշխատանք է տարվում, որի նկարագրությունն անիմաստ է, քանի դեռ արդյունք չկա։
«Նախկինում էլ գերեվարված մեր հայրենակիցների հարազատների հետ հանդիպումներից իքս պահի խուսափում էի, քանի որ ինչ էլ ասեի, իրենց համար դա ոչ մի բան էր, քանի դեռ իրենց հարազատները տանը չէին: Հետևաբար, հարցի սոլիդ պատասխանն այն է, որ մենք ամենօրյա աշխատանք ենք տանում: Արդյունավե՞տ է այդ աշխատանքը՝ քանի դեռ վերադարձը տեղի չի ունեցել, ակնհայտորեն՝ ոչ, բայց նույն կերպ մենք շատ երկար «անարդյունավետ» աշխատանք արեցինք դեկտեմբերին եկած եղբայրներին վերադարձնելու ուղղությամբ»,- հայտարարեց նա։
Լրագրողի դիտարկումը, որ ամիսներ առաջ ՌԴ նախագահ Վլադիմիր Պուտինն ասաց, որ Արցախի նախկին նախագահներին ՀՀ-ում չեն սպասում, հիմքեր ունի՞՝ նման բան ասելու ՌԴ նախագահը, արդյո՞ք ՀՀ-ում նրանց չեն սպասում՝ Փաշինյանը թողեց անպատասխան։