Քաղաքագետ Ստյոպա Սաֆարյանը «Ֆեյսբուք»-ի իր էջում անդրադարձել է համացանցում տարածվող տեսանյութին, որում մի քանի տղամարդ հայտարարում են, թե դեսանտներ են և ուղևորվում են Հայաստան՝ Վազգեն (Բագրատ) Գալստանյանի հայտարարած հանրահավաքին մասնակցելու:
«Հուլիսի 26-ի «սրբազանափրկիչ» հավաքին ընդառաջ Կիրիլը փրկիչներ է ուղարկում, որ Խայաստանը փրԳեն»,- գրել է Սաֆարյանը:
Գրառմանը կից նա լուսանկար է հրապարակել:
Տեսանյութում Հայ դատի Մոսկվայի գրասենյակի ղեկավար հանդես եկող տղամարդը ներկայանում է որպես Ներսես Ներսեսյան, ասում, որ «փրկության և վերականգնման նոր հույս է արթնացել»: Ըստ նրա՝ բոլորը պետք է համախմբվեն և միանան «Սրբազան պայքարին»:
Ներսեսյանը կոչ է անում ռուսաստանաբնակ հայերին մեկնել Հայաստան ու միանալ շարժմանը: Նրա խոսքով՝ Մոսկվա-Երևան ավտոերթ է նախաձեռնվել:
Արշակ Գրիգորյան անունով ներկայացած մեկ այլ տղամարդ էլ կոչ է անում բոլոր նրանց, ովքեր իրենց «իսկական հայ և հավատացյալ» են համարում, միանալ Վազգեն (Բագրատ) Գալստանյանի պայքարին:
Տեսանյութում կան մի քանի այլ տղամարդիկ ևս, որոնք հանդես են գալիս նույն կոչով և ներկայանում այս կամ այն կազմակերպության ղեկավար:
