Չի կարող այնպես լինել, որ մենք ուզենանք վնասել Ռուսաստանին. Փաշինյան
«Չի կարող լինել այդպիսի բան, որ մենք ուզենանք վնասել Ռուսաստանին։ Ամեն դեպքում` դա է մեր պատկերացումը ռազմավարական գործընկերության մասին: Մենք չենք կարող ոչ մի տեղ եւ երբեք գործել մեկս մյուսի դեմ»,-այս մասին ասել է ՀՀ վարչապետ Նիկոլ Փաշինյանը՝ մեկնաբանելով «Ռոսիյսկայա գազետա»-ի հարցն այն մասին, թե մի շարք ԶԼՄ-ներ տեղեկություններ են տարածում, որ ԱՄՆ միջոցների հաշվին կառուցված հայկական կենսալաբորատորիաներում կարող են Պենտագոնի պատվերով աշխատանքներ կատարվել։
Փաշինյանը նշել է, որ այդ լաբորատորիաները ստեղծվել են ԱՄՆի միջոցների օգնությամբ, սակայն այսօր համարվում են բացառապես Հայաստանի Հանրապետության սեփականությունը։ «Ոչ ոք դրսից առանց մեր երկրի իշխանության ներկայացուցիչների թույլտվության չի կարող ներթափանցել այդ օբյեկտների տարածք»,-նշել է վարչապետը:
Հիշեցնենք, որ ավելի վաղ հայտնի էր դարձել, որ Ռուսաստանն ու Հայաստանը հետաձգել են այդ լաբորատորիաներ ռուսաստանցի մասնագետների մուտքը թույլատրելու մասին հուշագրի ստորագրումը։ Փաստաթուղթը պետք է ստորագրվեր վերջերս Հայաստան ՌԴ ԱԳ նախարար Սերգեյ Լավրովի այցի ժամանակ, սակայն անհայտ պատճառներով դա տեղի չէր ունեցել։
Փաշինյանը հավելել է. «Մենք Ռուսաստանի հետ ունեինք պայմանագրի նախագիծ, մենք պատրաստ էինք այն ստորագրել, սակայն ռուսաստանցի գործընկերները որոշեցին դրա վրա էլի աշխատել։ Կաշխատենք դրա վրա, եւ երբ երկու կողմերը համաձայն լինեն, կստորագրենք»: