Արցախի ժողովրդի ճակատագիրը ինչպե՞ս եք պատկերացնում դուք որպես ԱԳ նախարար, որը մի քանի սուր ելույթներ ունեցավ միջազգային ամբիոններում և միջազգային ընկալման տեսակետից լավ էլ ընդունվում էր մինչև այն պահը, երբ Նիկոլ Փաշինյանը, ինչպես ինքն է ասում՝ քուանշեց Ձեզ և դա էլ, ցավոք սրտի, միջազգային ամբիոններում օգտագործեցին մեր թշնամինները։
Այս մասին 2023 թվականի ԱԳ նախարարության բյուջեի կատարողականի ժամանակ ԱԺ-ում նախարար Միրզոյանից հետաքրքրվեց «Հայաստան» խմբակցության քարտուղար Արծվիկ Մինասյանը։
«Արդյո՞ք դուք ունեք մեխանիզմ հնարավորություն այս հարցերը միջազգային ասպարեզում պահելու համար»,- հարցրեց նա։
Ի պատասխան, Արարատ Միրզոյանը նրան ասաց, որ միայն իրենց մեղադրում են, իրենք ի՞նչ տեսակետ ունեն ու երբ Մինասյանն ասաց, որ հայեցակարգ ունեն դրա մասին մշակած, որտեղ նշվում է ինքնավարության մասին, Արարատ Միրզոյանը արձագանքեց․
«Ասում եք Լեռնային Ղարաբաղի ինքնավարություն, հրաշալի է բացի նրանից, որ Դուք դա հիմա ասում եք այն պահին և այն պայմաններում, երբ Լեռնային Ղարաբաղում այլևս հայ չկա։ Երբ որ ԼՂ-ում հայեր կային և մենք առաջարկում էինք իջեցնել նշաձողը անկախությունից և խոսել այդ տեսակ հարցերի մասին, մեզ ասում էին դավաճան, թրքաբարո, թուրք, պիղծ։ Եթե մենք ամեն անգամ վերցնում ենք նույն բառամթերքը, նույն գործիքը, գնում հագնում ենք պատի կարո՞ղ է ինչ-որ մի բան սխալ ենք անում»։
Միրզոյանը, ապա շարունակեց․ «Բաներ կան, որ դուք էլ եք ուշ հասկանում, բայց մեզ եք մեղադրում չհասկանալու մեջ, բա Դուք ինչի՞ չէիք շուտ հասկանում, որ կարելի է ինքնավարություն ասել»։
Ապա` Միրզոյանն ասաց, որ թող իր հարցը մնա օդում կախված, քանի որ Մինասյանն այլևս արձագանքի իրավունք չունի։ «Էլի կշփվենք, եթե թուրքական էլիտար զորքեր չբերենք Ձեզ ձերբակալելու»,- հեգնեց Միրզոյանը։