Երեկ ոչ լեգիտիմ իշխանության հերթական գործողության հետևանքով 100-ավոր քաղաքացիներ և մի քանի ոստիկաններ ստացել են մարմնական տարբեր աստիճանի վնասվածքներ։ Այս մասին ԱԺ-ում հայտարարեց «Հայաստան» խմբակցության քարտուղար Արծվիկ Մինասյանը։
Նա նշեց, որ երեկվա իրադարձությունները վերահաստատեցին, որ մենք շարունակում ենք գտնվել մի քաղաքական ռեժիմի պայմաններում, որը չի խնայում ոչ մի բան, ոչ մի կարմիր գիծ չունի և պատրաստ է ամենաբիրտ մեթոդներով, հանցագործ մեթոդներով ոտնահարել ոչ միայն սահմանադրական կարգը, քաղաքացիների կյանքի և առողջության դեմ կազմակերպի հանցագործություններ, այլ նաև պատրաստ է ամեն ինչ զոհաբերել, բացի իր աթոռից։
«Երեկվա իրականացված ամբողջ օպերացիան հստակ մշակված, դերաբաշխմամբ իրականացված գործողություն էր։ Նախ տեղեկատվական նախապատրաստություն էր իրականացվել, օրեր, ժամեր անընդհատ փորձ էր արվում վարկաբեկել շարժումը, շարժման առաջնորդին, այն բոլոր հաստատություններին, որոնք ազգային բնութագիր ունեն, եկեղեցուց սկսած ավարտված կուսակցություններով, այնուհետև, որպեսզի տպավորություն ստեղծվի, որ այս շարժումը իշխանատենչության շարժում է՝ փորձ էր արվում ներկայացնել և կեղծ մեղադրանքներ հնչեցնել շարժման տարբեր մասնակիցներին։ Հետո տեղի ունեցավ այն բուն գործողությունը, որն այս տեղեկատվական նախապատրաստությանը պետք է հաջորդեր, այն է՝ ոստիկանության բռնի գործողություններն արդարացնելը, ոստիկանության գործողությունները քաջալերելն ու խրախուսելը, որն ուղեկցվում էր Նիկոլ Փաշինյանի այս ամբիոնից ոգևորիչ խոսքերով՝ ուղղված բռնություն կիրառած ոստիկանների խոստումներով, ընդհուպ՝ պարգևատրումների խոստումներով, գնահաման խոստումներով, ինչպես նաև քաղաքական մեծամասնության ծափողջույններով այդ խոսքերին, ուղղված այն խոսքերին, թե ինչպես Արցախը ճանաչվեց Ադրբեջանի կազմում, ինչպես այս իշխանությունը հայաթափեց Արցախը և այս ամենից հետո պետք է իրականացվեր գործողությունը։
Թե այս դահլիճում գտնվող և թե դահլիճից դուրս գտնվող օպերատիվ սադրիչների միջոցով հրահրվեցին բախումներ, որի արդյունավետությունը պիտի լիներ այն, որ 100 քաղաքացիներ ստանային վնասվածքներ, այլ նաև 10-յակ քաղաքացիների նկատմամբ կարվերին կեղծ քրեական գործեր»։
Նա ընդգծեց, որ իրականում ՔԿ-ն պետք է քրեական գործեր հարուցեր ՀՀ սահմանադրական կարգը տապալած և իրենց լիազորություներից դուրս եկող մարդկանց նկատմամբ։
«Միակ առավելությունն այն է, որ այս շարժումը չէր առաջնորդում Նիկոլ Փաշինյանը, հակառակ դեպքում մահերն անխուսափելի կլինեին։ Բագրատ Սրբազանն ի սկզբանե, կարողացավ այս ամենը կառուցել այն սկզբունքով, որ որևէ հետագա սադրանքներ տեղի չունենան»։