Հոգևորականի կարգավիճակը ժամանակավոր սառեցրած և վարչապետ դառնալու հավակնություններ ունեցող Վազգեն Գալաստանյանը մամուլի ասուլիս է հրավիրել, որի ժամանակ լրագրողները նրանից հետաքրքրվեցին, թե որտե՞ղ է «Ժողովրդական համախմբում» կուսակցության նախագահ, «Տավուշը հանուն հայրենիքի» շարժման առաջնորդներից Սուրեն Պետրոսյանը։
Արձագանքելով հարցին՝ Գալստանյանն ասաց, որ Պետրոսյանին վերջին անգամ հանդիպել է հունիսի 13-ի երեկոյան, որի ժամանակ նա տեղեկացրել է՝ մի քանի օրով պետք է մեկնի երկրից:
«Վերադարձին մենք շատ հարցեր ունենք Սուրենին, թե ի՞նչ է իրականում տեղի ունեցել, որոշենք՝ այս ճանապարհը միասի՞ն ենք անցնում, թե՞ ոչ»,- նշեց ընդդիմության վարչապետի թեկնածուն:
Հարցին՝ եթե Պետրոսյանին առևանգել են, ապա ի՞նչ են պահանջել, որովհետև այդ խորհրդավոր լուրերի մեջ «լոգիկա» չկա, Գալստանյանը սկզբում փորձեց խուսափել պատասխանել՝ ասելով, թե հարցերի տարափ է սկսվում, ապա նշեց․ «Այս պահին ասացի այն, ինչ կա․ իրեն ուզեցել են, ըստ իր ներկայացման, դուրս պահել հունիսի 12-ին մասնակցելուց կամ ընդհանուր շարժումից, 12-ի առավոտյան տարբեր մարդկանց են հեռաձայնել, հրավիրել են հատուկ տեղեր, նաև՝ Սուրեն Պետրոսյանին։ Ըստ իր պատմելու՝ ինքը չի գնացել, բայց երեկոյան ժամը 6-ի մոտերը իրենք են մոտեցել, սև մեքենայով երկու հոգի և մի քանի հոգի էլ այլ կողմերից իրեն նստեցրել են մեքենան և, իր պատմելով, տարել են Հրազդան՝ ինչ-որ առանձին տեղ»։
Հիշեցնենք՝ ավելի վաղ «Հայկական ժամանակ»-ին հայտնի էր դարձել, որ Պետրոսյանը գնացել է Մոսկվա: Նրա խոսնակը հայտարարել էր, թե Պետրոսյանը պետք է հունիսի 18-ին վերադառնա, սակայն, ստացվում է, որ Պետրոսյանը դեռ չի եկել:
Սուրեն Պետրոսյանը դեռ Տավուշից լծվել էր Ադրբեջանի հետ սահմանազատման և սահմանագծման աշխատանքները խափանելու գործընթացին: Այնուհետև նա Վազգեն (Բագրատ) Գալստանյանի հետ քայլելով հասավ Երևան և ակտիվ մասնակցում էր շարժման գործողություններին:
Այդ ընթացքում վերջինս մի քանի օր սկսեց բացակայել հավաքներից: Այնուհետև կրկին հայտնվեց և լրագրողներին հայտնեց, թե աշխատանքային այցով գնացել էր Եվրոպա և Մոսկվա:
Հունիսի 12-ին էլ, երբ Գալստանյանը և նրա համակիրները փորձում էին սահմանադրական կարգը տապալելով գրոհել Ազգային ժողովի շենքը, որտեղ ընթանում էր ԱԺ-Կառավարություն հարցուպատասխանը, Պետրոսյանը բախումների ժամանակ անսպասելի անհետացավ:
Շարժման անդամները և համակիրները սկսեցին պնդել, թե իրավապահները նրան, այսպես ասած, առևանգել են: Այնուհետև այս պնդումները հերքվեցին, երբ Ազգային ժողովի պատգամավորներին իրավապահ կառույցներից վստահեցրել էին, որ Պետրոսյանի անհետացման հետ որևէ առնչություն չունեն իրենք:
Շարժման առաջնորդներից ընդդիմադիր պատգամավոր Գառնիկ Դանիելյանը հայտարարել է, որ Սուրեն Պետրոսյանը պետք է պարզաբանի, թե ինչ է եղել այդ օրը, քանի որ վերջինիս քաղաքական գաղափարակիցները այդ օրվանից հետո չեն տեսել նրան:
Նկատենք, սակայն, որ բազմաթիվ քաղաքացիներ և քաղաքագետներ պնդում են՝ Պետրոսյանը, հասկանալով, թե ինչ հակաօրինական գործողություններ է փորձել իրականացնել այն շարժումը, որի առաջնորդներից է ինքը, պարզապես փախուստի է դիմել՝ պատասխանատվությունից խուսափելու համար:
Ըստ պնդումների՝ նա մտածել է՝ Վազգեն Գալստանյանը հոգևորական է, Գառնիկ Դանիելյանը՝ պատգամավոր, նրանց ձերբակալելու հավանականությունն ավելի քիչ է, քան իրենը, այդ իսկ պատճառով անհետացել է տեսադաշտից:
medianews.site/