Իրավապահ մարմիններին չի հաջողվել տաք հետքերով բացահայտել քրեական հեղինակություն համարվող Սերգեյ Գրիգորյանի՝ «Ֆազի», սպանությունը։ Երկու շաբաթ անց՝ քրեական վարույթում կասկածյալներ չկան։ Զուգահեռ իր «հետաքննությունն է» իրականացնում հանցավոր աշխարհը ու իրավապահների ձախողման ֆոնին ավելի է մեծանում Երեւանում նոր արյունահեղության՝ վենդետայի վտանգը։
Հիշեցնենք, որ դեպքը տեղի է ունեցել հունիսի 11-ին՝ ուշ երեկոյան, Աջափնյակ վարչական շրջանում. մահաբեր կրակոցներն արձակվել են բնակելի շենքի մոտ։
Նախ ՆԳՆ-ից հայտնեցին, որ հունիսի 11-ին՝ ժամը 23.17-ին ոստիկանության Մաշտոցի բաժնում հաղորդում է ստացվել, որ Էստոնական փողոցում զենքով կրակում են, ապա՝ ժամը 23.53-ին «Արմենիա» ՀԲԿ-ից հաղորդել են, որ «պարանոցի շրջանի հրազենային վնասվածք» ախտորոշմամբ բուժօգնության են ընդունվել 1988թ.ծնված և «գլխի մարմնի տարբեր հատվածների հրազենային վնասվածք» ախտորոշմամբ 1980թ.ծնված երկու տղամարդ։
«Մեկնած օպերատիվ-քննչական խումբը պարզել է, որ ժամը 23.13-ին Շինարարների 25 շենքի դիմացի հատվածում անհայտ անձը հրազենից կրակել է հիվանդանոց տեղափոխված տղամարդկանց ուղղությամբ, որտեղ 1980թ.ծնված Սերգեյ Գ-ն գիտակցության չգալով մահացել է: Կազմված փաստաթղթերը փոխանցվել են քննչական բաժին»,- նշել են ՆԳՆ-ից։
Ավելի ուշ արդեն ՔԿ-ից հայտնեցին, որ դեպքի առթիվ ՀՀ քրեական օրենսգրքի 155-րդ հոդվածի 2-րդ մասի 7-րդ կետի, 44-155-րդ հոդվածի 2-րդ մասի 7-րդ կետի և 335-րդ հոդվածի 1-ին մասի հատկանիշներով նախաձեռնվել է քրեական վարույթ։ Կատարվել է դեպքի վայրի զննություն, որտեղ՝ Երևան քաղաքի Շինարարներ փողոցում, միմյանց բախված վիճակում, կայանված են եղել «LAND CRUISER», «TOYOTA CAMRY», «OPEL ASTRA» և «TOYOTA COROLLA» մակնիշների ավտոմեքենաներ: «LAND CRUISER» մակնիշի առջևի և հետևի հատվածներում հայտնաբերվել են կրակոցի հետևանքով առաջացած վնասվածքներ, իսկ սրահում արնանման նյութի հետքեր: «OPEL ASTRA» մակնիշի ավտոմեքենայի բեռնախցիկի հատվածում, ինչպես նաև դեպքի վայրում հայտնաբերվել են տարբեր տրամաչափի բազմաթիվ պարկուճներ և փամփուշտ:
Դեպքից շուրջ երկու շաբաթ անց, սակայն, իրավապահներին դեռ չի հաջողվել անգամ դուրս գալ հանցագործությունը կատարած անձանց հետքի վրա։ ՔԿ-ից, «Փաստինֆո»-ի հետ զրույցում հայտնեցին, որ քրեական հետապնդման ենթարկվող անձ դեռևս չկա, միևնույն ժամանակ, վստահեցրին, որ լայնածավալ նախաքննություն է իրականացվում։
Փաստն այն է, որ չարագործներն առ այս պահը բացահայտված չեն, ինչն ավելի է մեծացնում հանցավոր աշխարհում վենդետայի վտանգը, որոնք դառնում են ավելի սանձարձակ։