Բաքվի՝ COP-29-ին մասնակցելու հրավերը ՀՀ իշխանությունները չեն մերժել։ ԱԳՆ-ից արձագանքել են, թե հարցին անդրադարձ լինելու պարագայում կտեղեկացնեն։ Վարչապետի աշխատակազմից ասել են, թե օգոստոսին Նիկոլ Փաշինյանն ասուլիս է տալու և այդ հարցին պատասխանելու առիթ կլինի։ Իսկ ՔՊ-ական որոշ գործիչներ, օրինակ՝ ԱԺ պատգամավոր, ԱԺ պաշտպանության և ներքին գործերի մշտական հանձնաժողովի նախագահ Անդրանիկ Քոչարյանը «Ազատությանը» տված հարցազրույցում ճիշտ է համարում մասնակցելը։ Խնդիրը գինն է։ Ակնկալվում է, որ եթե Ադրբեջանը որոշ հայանպաստ բաներ անի, դրա դիմաց ՀՀ-ն կհամաձայնվի խելոք մասնակցել COP-29-ին։
Թեմային անդրադարձել է նաև Միջազգային քրեական դատարանի առաջին դատախազ Լուիս Մորենո Օկամպոն հայ ժողովրդին հասցեագրված ընդարձակ ուղերձում, որտեղ առաջարկում է կազմակերպված հրապարակումներով մերկացնել Ադրբեջանի ցեղասպան, հակամարդկային, հակաքաղաքակրթական գործունեությունը, բարձրացնել Արցախ վերադառնալու, Արցախի կալանավորված ղեկավարների ազատ արձակման հարցերը։ Չնայած՝ Օկամպոյի գրվածքը լայն արձագանք է գտել հայ հանրության շրջանում, սակայն իշխանության մոտեցումը պարզ չէ։ Ինչպե՞ս կվարվի ՔՊ-ական իշխանությունը։ Կգնա՞ Բաքու։
Բաքվին ձեռնտու չէ ՀՀ մասնակցությունն այդ համաժողովին, եթե ՀՀ ներկայացուցիչն այնտեղ խոսելու է ադրբեջանական վայրագությունների, Արցախը զավթելու, Արցախի բնակչությանը բռնի տեղահանելու, ՀՀ ինքնիշխան տարածքներ ներխուժելու, այնտեղից դուրս չգալու, գերիների ազատ արձակման մասին։ Այդպիսի ելույթն անցանկալի է մեր թշնամու համար։
Այս անհարմար իրավիճակից Բաքուն կարող է դուրս գալ միայն Նիկոլ Փաշինյանի օգնությամբ։ Վերջինս կարող է խոստանալ, որ չի շեղվելու համաժողովի օրակարգից և չի խոսելու Արցախի, գերիների ազատման և հայանպաստ այլ թեմաների մասին, խելոքն նստելու է մի անկյունում։ Այս դեպքում էլ ՀՀ իշխանությունները կարող են հայտնվել վատ վիճակում, ցույց տալով, որ ազգային ինքնասիրություն չունեն, ազգային շահերն անտեսում են։ ՔՊ-ական իշխանությունը չի կարող նաև նախապայմաններ առաջարկել, որովհետև դրանք չեն քննարկվի, քանի որ չեն առնչվում համաժողովի օրակարգին։ Այստեղ ծագում է խնդիր։ Ինչպե՞ս է հնարավոր կապել COP-29-ի օրակարգը հայկական օրախնդիրների հետ։ Այս մասին է նաև Օկամպոյի ուղերձը։ Փորձառու իրավաբանը ուղիղ կոչ էր անում իրավունքն ու մարդասիրությունը ընդհանուր հայտարար դարձնել այս երկու թեմաների միջև և խոսույթը ձևավորել այդ համատեքստում։
Այսպիսի խնդիրը հեշտ լուծելի է մանիպուլյացիաների վարպետ Նիկոլ Փաշինյանի համար։ Եվ ՔՊ-ում կարող են գտնել խիզախ մեկին, օրինակ՝ Անդրանիկ Քոչարյանին, որը Բաքվում հայանպաստ հարցեր բարձրացնելու խիզախություն կունենա, Օկամպոյի նախանշած նարատիվները կզարգացնի ու կպատռի Բաքվի դիմակն ու աշխարհին ցույց կտա նրա իրական՝ հակաքաղաքրթական դեմքը։
Սակայն հաշվի առնելով Նիկոլ Փաշինյանի՝ խաղաղության պայմանագիրը մեկ ամսում և առանց նախապայմանների ստորագրելու պատրաստակամությունը, իրական Հայաստանի մասին առաջ մղվող կեղծ թեզը, Արցախը Ադրբեջանինը համարելու պնդումները, ՀՀ-ից զավթված տարածքները հետ բերելուն ուղղված դիվանագիտական ջանքեր չգործադրելը, ինչպես նաև՝ ՔՊ-ական թիմի ընդհանուր փոքրոգությունը, ենթադրելի է, որ Փաշինյանն այդպիսի հայանպաստ քայլ չի անի։
Պարզ ասած՝ օգոստոսին Նիկոլ Փաշինյանը հորինված պատճառներով կմերժի հրավերը, կհավաստիացնի իր կողմից հարգված Ալիևին ու նրա դաշնակից ռուսներին ու թուրքերին, որ ինչպես նախկինում, այդպես էլ հիմա չեն պաշտպանում ՀՀ ազգային շահերը, հետևաբար՝ մտադիր չեն հարամել COP-29-ի սիրուն միջոցառումը և անհարմարություն պատճառել Ալիևին։
ORAGIR.NEWS