Հայաստանի սպառազինությունը սպառնալիքի լրացուցիչ աղբյուր է տարածաշրջանի համար, հայտարարել է Ադրբեջանի արտգործնախարար Ջեյհուն Բայրամովը Անկարայում իր թուրք գործընկեր Հաքան Ֆիդանի հետ համատեղ ասուլիսի ժամանակ։
Նրա խոսքով՝ Հայաստանին դրան մղում են երրորդ երկրները. «Նկատվող միտումը մտահոգություն է առաջացնում։ Այս ոչ ճիշտ քաղաքականությունը դառնում է սպառնալիքի լրացուցիչ աղբյուր տարածաշրջանի համար։ Իհարկե, Ադրբեջանը հետևում է գործընթացներին, և դա արվում է Թուրքիայի հետ համակարգված։ Սա փոխադարձ աջակցություն է, ռազմավարական գործընկերություն և դաշնակցային հարաբերություններ։ Մենք հավատում ենք, որ մեր երկրների այս քաղաքականությունը տարածաշրջանում կբերի խաղաղություն, անվտանգություն և կայունություն»,- ասել է Ադրբեջանի ԱԳՆ ղեկավարը։
Բայրամովը հայտարարել է նաև, որ Թուրքիան աջակցում է Ադրբեջանին Ղարաբաղի վերականգնման գործընթացում. «Տարածաշրջանում ադրբեջանական ընկերություններին մեծ աջակցություն են ցուցաբերում թուրքական ընկերությունները… Ակնկալվում է, որ մինչև այս տարվա վերջ ավելի քան 20 հազար նախկին ներքին տեղահանվածներ կվերադառնան «իրենց» հողերը: Իսկ 2026 թվականի վերջին ավելի քան 140 հազար քաղաքացիներ կվերադառնան Ղարաբաղ վերաբնակեցման առաջին փուլի շրջանակներում»։
Հիշեցնենք, որ Ադրբեջանի ԱԳ նախարարը մեկօրյա աշխատանքային այցով գտնվում էր Անկարայում: