Օգոստոսի 29-ի գիշերը ռուսական բանակը մեկ շաբաթվա ընթացքում երրորդ անգամ «Շահեդ»-ներով ու հրթիռներով հարվածել է Ուկրաինային։ Կիևում անօդաչու թռչող սարքի բեկորներ են ընկել Դնեպրի, Գոլոսեևսկի և Դեսնյանսկի շրջանների բնակելի տների վրա։
Նախնական տվյալներով՝ զոհեր և վիրավորներ չկան, փոխանցում է Current Time-ը։ «Հակառակորդի անօդաչու թռչող սարքերի հարձակումը Կիևի վրա շարունակվում է։ Դնեպրի շրջանում ավերածություններ կամ զոհեր չեն գրանցվել։ Տվյալները ճշտվում և թարմացվում են»,- ասել է Կիևի քաղաքային ռազմական վարչակազմի ղեկավար Սերգեյ Պոպկոն։
Տեղի իշխանությունները նշել են, որ բեկորներ են ընկել նաև մայրաքաղաքի Գոլոսեևսկի թաղամասի տների վրա. այնտեղ վնասվել են դռներ, կոտրվել են բարձրահարկ շենքի բնակարաններից մեկի պատուհանները: Դեսնյանսկի թաղամասում բեկորներ են ընկել առանձնատան վրա, ամառանոցը հրդեհվել է։ Ռուսական բանակը ԱԹՍ-ներով Կիևը գրոհել է վեց ժամ շարունակ, խոցվել է 15 անօդաչու թռչող սարք, ասել է Պոպկոն։
Նա նշել է, որ ռուս զինվորականների արձակած անօդաչուներից ոչ մեկը չի հասել իր թիրախին։ Ռուսաստանի ՊՆ-ն իր հերթին հայտնել է վեց խոցված անօդաչու թռչող սարքի մասին: Ըստ հաղորդագրության՝ երեք անօդաչու թռչող սարք է խոցվել բռնակցված Ղրիմում, երկուսը՝ Բրյանսկի և մեկը՝ Բելգորոդի շրջանում։
Ռուսաստանի իշխանությունների կողմից նշանակված Սևաստոպոլի ղեկավար Միխայիլ Ռազվոժաևը գրել է, որ օգոստոսի 29-ի գիշերը չորս անօդաչու թռչող սարք են խոցել, երեք անօդաչու նավ է ոչնչացվել։ Նա հավելել է, որ դա տեղի է ունեցել «ափից զգալի հեռավորության վրա», վնասներ չկան։