«Վրաստանում արդեն խոսվում է հեղափոխության մասին, սակայն այն դեռ չի հասունացել»,-այս մասին այսօր «Տեսակետ» մամուլի ակումբում, անդրադառնալով Վրաստանում տեղի ունեցող ցույցերին, ասաց «Կովկաս» ինստիտուտի գիտաշխատող, քաղաքագետ Հրանտ Միքայելյանը:
Նա մի քանի խոսքով անդրադարձավ ընդդիմության ցույցերի պատճառներին և ասաց, որ Վրաստանի խորհրդարանում պիտի լիներ 100 տոկոսանոց համամասնական ընտրական համակարգ, ինչպես խոստացվել էր, սակայն իշխանության ներկայացուցիչներից ոմանք, որոնք անցել էին մեծամասնական ընտրակարգով, դեմ քվեարկեցին: Իրադարձությունների այդպիսի ընթացքի պարագայում ընդդիմադիրները միավորվեցին, նրանց միացան անգամ մինչ այդ լոյալ ուժերը, և սկսվեցին ցույցերը Վրաստանում:
Բանախոսը նկատեց, որ Վրաստանում իրադարձություններն այնքան արագ են զարգանում, որ Նիկոլ Փաշինյանն արդեն հասցրել է հանդիպում ունենալ Վրաստանի երրորդ վարչապետի հետ:
Միքայելյանն ասաց, որ մեկ տարի հետո Վրաստանում պիտի խորհրդարանական ընտրություններ անցկացվեն, սակայն այսօր արդեն խոսվում է հեղափոխության մասին, որը, ըստ բանախոսի, դեռևս չի հասունացել: Նա բացառեց նաև, որ հեղափոխություն կլինի 2003-ի սցենարով:
Ինչ վերաբերում է տեղի հայերին և նրանց դիրքորոշմանը՝ բանախոսն ասաց, որ այնտեղ հայերը սովորաբար միշտ իշխանակմետ են լինում՝ պայմանավորված այն բանով, որ իշխանությունները Վրաստանում ճնշում են ազգային փոքրամասնություններին, մասնավորապես՝ հայերին:
«Վախի պատճառով հայերը դարձել են պրոիշխանական, թեև վերջին շրջանում մարդու իրավունքները Վրաստանում նախկինից ավելի լավ են պաշտպանվում»,-ասաց Հրանտ Միքայելյանը:
Մանրամասները՝ տեսանյութում