Նիկոլ Փաշինյանն իր վերջին ասուլիսում Ադրբեջանին առաջարկեց գործարք, որին, կարծես թե, Ադրբեջանը չի համաձայնում,- «Փաստինֆո»-ին ասաց քաղաքագետ Սուրեն Սուրենյանցը՝ անդրադառնալով Բաքվի կողմից այսօր վերջնագրի նման հնչեցրած հայտարարությանն առ այն, որ քանի դեռ Հայաստանը չի փոխել իր Սահմանադրությունը, խաղաղության պայմանագիրը չի կարող ստորագրվել։
Սուրենյանցի խոսքերով՝ Փաշինյանի առաջարկած գործարքով, ըստ էության, ասվում էր՝ ինձ տուր Խաղաղության պայմանագիր, այսինքն թուղթ, որի վրա գրված կլինի Խաղաղության պայմանագիր, որի միջոցով կկարողանամ վերարտադրվել, իսկ հետո կփոխեմ ՀՀ սահմանադրությունը, ասենք, 2027 թվականին, ինչպես խոստացվել է, բայց Ադրբեջանը չի համաձայնում։
Սուրեն Սուրանյանցը համարում է, որ հարևան երկրի արտգործնախարարի մամլո խոսնակի նման հայտարարությունը նշանակում է, որ Ադրբեջանը Փաշինյանի առաջարկած գործարքին չի համաձայնում։ «Հիմա Ադրբեջանն այդ խաղին չի համաձայնվում, ակնհայտորեն նա ուզում է ինչ-որ բաներ հենց հիմա ստանալ, ինչին գումարած հաստատ նոր պահանջներ է բերելու։ Չկարծեք, որ եթե այսօր սահմանադրությունը փոխենք, ստորագրվելու է, դրանից հետո կբերեն ուրիշ պայմաններ, որովհետև այս պահին իրենց պետք չէ ոչ մի փաստաթուղթ ստորագրել»,- ասել է քաղաքագետը՝ ավելացնելով, որ Ամիրբեկովը դեռ ավելի վաղ հայտարարել է, որ Սահմանադրության փոփոխության հարցը Նիկոլ Փաշինյանը քննարկել է Ադրբեջանի ղեկավարության հետ, եւ մենք ՀՀ ից հերքում չենք լսել։
Թող, օրինակ, կանգնեն ասեն, որ Ամիրբեկովը ստել է»,- նկատեց Սուրենյանցը։ Իսկ սահմանադրական փոփոխությունները, ինչպես նշեց քաղաքագետը, արագացնել չեն կարող, պրոցեդուրան դա թույլ չի տալիս։ ««Խաղաղության պայմանագիր » մի սպասեք մոտ ապագայում»,- ընդգծեց Սուրենյանցը՝ կարծիք հայտնելով, որ դիվանագիտական փոխհրաձգությունը կշարունակվի, բայց փաստաթղթի սպասել պետք չէ, անգամ հնարավոր է էսկալացիա լինի։