Բոլոր տարիների իշխանություններից մենք պահանջել ենք ճանաչել Արցախի անկախությունն Ադրբեջանից, որովհետեւ Արցախն իր անկախությունը հայտարարել էր 1991-ի սեպտեմբերի 2-ին՝ հանրաքվեով: Այս մասին այսօր՝ սեպտեմբերի 21-ին «Եռաբլուր» պանթեոնում լրագրողների հետ զրույցում նշեց ԱԺ նախկին փոխնախագահ, Երեւանի նախկին քաղաքապետ, ազատամարտիկ Ալբերտ Բազեյանը:
«ԽՍՀՄ-ը փլուզվեց 1991-ին եւ մենք երեք տարիների ընթացքում հաղթանակ տարանք շնորհիվ ազատամարտիկների հերոսության, հայ զինվորականների վերադարձով Հայաստան, որոնք կազմակերպեցին եւ մենք կարողացանաք հաղթել այդ պատերազմում: Ցավոք սրտի, այսօր մենք գտնվում ենք պարտված ժողովրդի, պարտված պետության կարգավիճակում: Մենք կորցրել ենք Արցախը եւ Հայաստանի տարածքի մի քանի տասնյակ քկմ եւ շատ կարեւոր նշանակություն ունեցող բարձունքներ: Ադրբեջանն անընդհատ նոր պայմաններ, նոր պահանջներ է դնում Հայաստանի առջեւ: Խաղաղության համաձայնագիր կկնքեն միայն այն դեպքում, երբ Հայաստանն իր Սահմանադրությունից հանի ցեղասպանության խնդիրը, Արցախի հետ կապված հարցերը:
Մենք այսօր ծանր վիճակում ենք գտնվում, բայց ամեն ինչ հարաբերական է: Յուրաքանչյուր ժողովրդի մեջ լինում են անկման շրջաններ եւ վերելքի շրջաններ: Մենք այսօր գտնվում ենք նիկոլական անկման ժամանակաշրջանում, գալու է վերելքի ժամանակաշրջանը: Մենք համախմբելու ենք մեր ազգային, քաղաքական առողջ ուժերին, հասարակական կառույցներին, հիմնադրամներին, հայրենակցական միություններին, մարզային ու մշակութային գործիչներին, ձեւավորելու ենք այլընտրանք այսօրվա իշխանությանը»,- հայտարարեց Բազեյանը:
Նա նկատեց, որ Նիկոլ Փաշինյանը պաշտպանված է, որովհետեւ ժողովուրդը չի տեսնում այլընտրանք. «Մի կողմում Նիկոլ Փաշինյանն է, մյուս կողմում Ռոբերտ Քոչարյանի «Հայաստան» դաշինքն է, եւ Սերժ Սարգսյանի «Պատիվ ունեմ» դաշինքը: Այսինքն 6 տարի առաջ նույն ուժերն էին, 2021-ի ընտրություններին էլի նույն ուժերն էին: Նոր ուժ է պետք: Պետք է ձեւավորել համահայկական միացյալ դաշինք, ողջ Հայաստանով մեկ ոտքի հանել մեր ժողովրդին եւ անհնազանդություն հայտնել այսօրվա պարտվողական իշխանությանը, պարտադրել Նիկոլ Փաշինյանի կառավարության հեռացումը եւ գործող ԱԺ-ի լուծարումը: Կարճ ժամկետի համար ձեւավորել ժամանակավոր անցումային կառավարություն, որը կնախապատրաստի արդար, օրինական ԱԺ ընտրություններ»,-ասաց Բազեյանը:
Նշենք, որ զոհված զինծառայողների ծնողները, որոնք Եռաբլուրում էին նախօրեից, լրագրողների հետ զրույցում հայտարարել են, որ հավաքվել են այնտեղ, որպեսզի թույլ չտան Փաշինյանի մուտքը Եռաբլուր: