Այրվում էր Պուշկին փողոցում գտնվող «Դոլմամա» ռեստորանի տանիքը։ «Փաստինֆո»-ի թղթակցի փոխանցմամբ՝ այնտեղ է նաև Բարձր տեխնոլոգիական արդյունաբերության նախարար Հակոբ Արշակյանը, ով լրագրողներին հայտնել է՝ տուժող չկա, իսկ թե ինչն է հանդիսացել հրդեհի բռնկման պատճառ, նախարարը տեղյակ չէ։ Հակոբ Արշակյանն ասել է, որ տանիքն ամբողջությամբ փայտ է, ինչի պատճառով էլ հրդեհը դժվար է մարվում։
«Փաստինֆո»-ի թղթակցի հաղորդմամբ տարածքի բնակիչներից մեկը կարծիք է հայտնել, որ հրդեհը միտումնավոր է առաջացել. «Եթե հիմա սա որպես պատմամշակութային տարածք վերացավ, պարզ չէ, որ մեծ հեշտությամբ կարող են այս տարածքում նորից շենք կառուցել և կրկին ծախի այդ տարածքները։ Մենք բոլոր բնակիչներով վստահ ենք, որ հրդեհը միտումնավոր է»,-նշեց բնակիչներից մեկը։
Հարցին՝ ով է կանգնած հրդեհի հետևում, բնակիչն ասաց իրենց տարածքները ձեռք բերողը՝ Սամվել Մայրապետյանը. «Տարածքները վերցրել է Սամվել Մայրապետյանը 10-15 տարի առաջ և բնակիչներիս ասել են, որ այս տարածքում ուզում են հյուրանոց սարքել։ Մենք պայքարեցինք և հեղափոխությունից հետո էլ ասացինք, որ այս տարածքներից չենք դուրս գալու։ Արդեն որերորդ անգամ է, որ մեր տարածքներում միտումն»,-հավելեց բնակիչը։
Ինչպես տեղեկացրել ենք՝ այսօր ժամը 13:46-ին «911» ծառայություն ահազանգ է ստացվել, որ Երևանի Աբովյան և Պուշկինի փողոցների խաչմերուկում՝ երկհարկանի շինության տանիքում, հրդեհ է բռնկվել: Պարզվել է, որ հրդեհը բռնկվել է Աբովյան 10 հասցեում գտնվող ռեստորանի տանիքում: Այրվում են տանիքի փայտյա կառուցատարրերը:
Ժամը 14:19-ին հրդեհի բարդության աստիճանը բարձրացվել է «Թիվ-3» կանչի:
Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից ևս չորս մարտական հաշվարկ և մեկ ավտոսանդուղք:
- Լրահոս
- Թրենդային