Շենգավիթում 28-ամյա «Կյաժ Աշոտի» սպանության գործով կալանավոր Կոնստանտին Հունանյանին՝ «Կոկո»-ին, որը «Արթմեդ» ԲԿ-ից փախուստի է դիմել նախօրեին, իրավապահները դեռևս չեն հայտնաբերել։ Քրեակատարողական ծառայության հասարակայնության հետ կապերի վարչության պետ Նոնա Նավիկյանը «Փաստինֆո»-ի հետ զրույցում հայտնեց, որ այս պահին որոնողական գործողություններ են ընթանում։
Ինչպես արդեն տեղեկացրել ենք՝ հոկտեմբերի 1-ին՝ ժամը 13:00-ի սահմաններում «Արթմեդ» ԲԿ-ում ստացիոնար բուժում ստացող քրեական հեղինակություն համարվող «Ալավերդյանցի Կոկոն»՝ Կոնստանտին Հունանյանը, փախուստի է դիմել։
Իրավապահներին առ այս պահը չի հաջողվել տաք հետքերով հայտնաբերել կալանավորին, իսկ փախուստի դիմելու դեպքով քրեական վարույթ է նախաձեռնվել։ ՔԿ մամուլի քարտուղար Գոռ Աբրահամյանը «Փաստինֆո»-ի հետ զրույցում հայտնեց, որ կա նախաձեռնված քրեական վարույթ ՀՀ քրեական օրենսգրքի 506-րդ հոդվածի՝ կալանավորի փախուստի և 446-րդ հոդվածի ՝ պաշտոնեական անփութության հատկանիշներով։
«Փախուստի դիմած անձի նկատմամբ քրեական հետապնդում է հարուցվել 506-րդ հոդվածով և հանձնարարություն է տրվել ոստիկանությանը ներկայացնել մեղադրյալին վարույթն իրականացնող մարմնին»,-հայտնեց Աբրահամյանը։
Նշենք, որ Կոնստանտին Հունանյանը կալանքի տակ է Շենգավիթում հայտնի «Ռիմա Թրեվել» ՍՊԸ-ի սեփականատեր՝ 28-ամյա Աշոտ Պետրոսյանի՝ «Կյաժ Աշոտի», սպանության գործով։ Մինչ այդ էլ՝ Հունանյանը դատապարտված է եղել ավազակային հարձակման գործով։
Հիշեցնենք, որ Աշոտ Պետրոսյանի՝ «Կյաժ Աշոտի» աղմկահարույց սպանությունը տեղի է ունեցել 2020թ հունիսի 9-ին՝ Շենգավիթում. Աշոտ Պետրոսյանի և մի խումբ անձանց միջև տեղի ունեցած վիճաբանության ընթացքում փոխադարձ կրակոցներ էին արձակվել միմյանց ուղղությամբ, որի ընթացքում վիճաբանության Աշոտ Պետրոսյանը ստացել է հրազենային վիրավորում, ինչի հետևանքով «Շենգավիթ» ԲԿ-ում մահացել է։
Դեպքի առթիվ քրեական գործ էր հարուցվել, որի շրջանակներում մեղադրանք է առաջադրվել 7 անձի։ Ըստ մեղադրանքի՝ Կոնստանտին Հունանյանը ապօրինի կերպով ձեռք է բերել և կրել ակոսափող հրազեն հանդիսացող կարճափող ատրճանակ, մի խումբ անձանց՝ Կամո Խաչատրյանի, Սամվել Քրմոյանի, Համլետ Թորոսյանի, Տիգրան Հակոբյանի, Դավիթ Թադևոսյանի և գործով չպարզված անձանց հետ շատերի կյանքի համար վտանգավոր եղանակով սպանել է Աշոտ Պետրոսյանին, իսկ այնուհետև՝ ձեռք է բերել, պահել և կրել ակոսափող հրազեն հանդիսացող ինքնաշեն գնդացիր-ատրճանակ, 1975թ գործարանային արտադրության ակոսափող հրազեն հանդիսացող «ПМ» տեսակի ատրճանակ և ռազմամթերք հանդիսացող փամփուշտներ։ Համլետ Թորոսյանը մեղադրվում է ապօրինի կերպով ակոսափող հրազեն ձեռք բերելու և պահելու, ինչպես նաեւ մի խումբ անձանց հետ Աշոտ Պետրոսյանին սպանելու մեջ, Կամո Խաչատրյանը՝ ակոսափող հրազեն պահելու, կազմակերպված խմբի կողմից Պետրոսյանին սպանելու, ինքնաշեն գնդացիր-ատրճանակ և փամփուշտներ ձեռք բերելու և պահելու, Տիգրան Հակոբյանը՝ «АКМ» տեսակի ինքնաձիգ հրազեն ձեռք բերելու, կրելու, կազմակերպված խմբի կազմում սպանություն կատարելու, Դավիթ Թադևոսյանը և Սամվել Քրմոյանը՝ ապօրինի կերպով ակոսափող հրազեն ձեռք բերելու, կրելու, ինչպես նաև՝ սպանություն կատարելու, իսկ Վարդգես Այվազյանը մեղադրվում է Աշոտ Պետրոսյանի սպանությանն օժանդակելու մեջ։ Վերջիններիս նկատմամբ որպես խափանման միջոց է ընտրվել կալանավորումը։
Գործով նախաքննությունն ավարտվել է դեռևս 2021թ․-ին։ Գործը շուրջ երեք տարի է, ինչ Երևանի ընդհանուր իրավասության քրեական դատարանի դատավոր Վարդան Լ․ Գրիգորյանի վարույթում է։
Նշենք, որ նախաքննության փուլում եւս Կոկոն դիմել էր փախուստի ու շուրջ 1 տարի էր պահանջվել նրան հայտնաբերելու համար, թեեւ գտնվել էր Հայաստանում։ 2020 թվականից հետախուզման մեջ գտնվող «Կոկոյին» իրավապահները հայտնաբերել էին միայն 2021 թվականի օգոստոսին՝ Կենտրոնում գտնվող բնակարանում։