Այսօրվա վիճակով ոչ մի գործատու, կարելի է ասել, վստահություն չունի ուսանողի ստացած գնահատականի հանդեպ: Այս մասին Tesaketinfo.am-ի հետ զրույցում ասաց Մովսես Խորենացու անվան համալսարանի հիմնադիր, ռեկտոր Արթուր Աղաբաբյանը:
Նրա խոսքով՝ հայկական ու արտասահմանյան բուհերը միմյանց բավականաչափ նման են թե՛ կառուցվածքային սխեմաներով, թե՛ ուսուցման առանձնահատկություններով, թե՛ կառավարման խորհուրդների գործունեությամբ ու անգամ՝ հովանավորման տարբերակներով, սակայն կա մի էական տարբերություն, որն առանցքայի դեր է խաղում. դա գնահատման համակարգի մշակումն է:
«Մարդը կարող է դիպլոմը գնել, դիպլոմի մեջ գնահատականները շատ բարձր լինեն, բայց մասնագիտական հարցերի չկարողանա պատասխանել: Հակառակն էլ է լինում, ուստի պիտի գնահատման մեխանիզմը փոխվի այնպես, որ մենք կարողանանք վստահություն ձևավորել գործատուների շրջանում»,-նշեց Աղաբաբյանը:
Նա հավելեց, որ միևնույն ուսանողը, կախված բուհից, մի տեղ կարող է անբավարար ստանալ, մեկ այլ տեղ՝ գերազանց, մինչդեռ գնահատման համակարգը սուբյեկտիվ, դասախոսի տրամադրությունից կախված չպիտի լինի:
«Սուբյեկտիվիզմը դեր պիտի չխաղա: Դասախոսն այսօր կարող է տրամադրություն չունենալ, անբավարար նշանակել, վաղն էլ շատ լավ տրամադրությամբ գալ ու գերազանց նշանակել. դրա համար մտածելակերպ պիտի փոխվի»,-իր խոսքը պարզաբանեց բուհի ռեկտորը:
Իսկ մեր հարցին, թե կա՞ն արդյոք համապատասխան մեխանիզմներ, ինքն ունի՞ որևէ առաջարկ խնդրի լուծման ուղղությամբ, պարոն Աղաբաբյանը պատասխանեց, որ դեռ տարիներ առաջ մշակել ու տարբեր նախարարների է ներկայացրել գնահատման համակարգի իր տարբերակը:
«Օրինակ՝ իրավաբանական ֆակուլտետ բազմաթիվ բուհերում կա, մի բուհում քննական հանձնաժողովի նախագահն X-ն է, մյուսում՝ Y-ը: Մեկը մատների արանքով է նայում, ասում է՝ լավ, մեր երեխաներն են, բարձր գնահատենք, մյուսը քննում է, հիսուն տոկոսին կտրում: Եվ կարող է այնպես ստացվել, որ այստեղ կտրվածն ավելի ուժեղ լինի այնտեղի գերազանց ստացածից»,-մանրամասնեց ռեկտորը:
Ներկայացնելով իր առաջարկը՝ նա նշեց. «Ավարտական փուլի հետ կապված՝ տարբեր բուհերի նույն մասնագիտությամբ շրջանավարտները քննություն են հանձնում Հայաստանում ձևավորված մեկ միասնական հանձնաժողովի մոտ, որպեսզի բոլոր բուհերի ուսանողներին միասնական, միևնույն մոտեցումը ցուցաբերվի: Ընդ որում՝ հանձնաժողովը առավելագույնս օբյեկտիվ պետք է լինի, տարբեր նրբություններ կան, բոլոըը հաշվի են առնված, մեխանիզմներն էլ ենք ապահովում, որ օբյեկտիվ անցկացնեն, ֆինանսական ծախսերն էլ եմ մտածել այնպես, որ պետական բյուջեին չդիպչենք…»:
Արթուր Աղաբաբյանը հավելեց, սակայն, որ այս տարբերակը չի կիրառվել: Նա վստահեցրեց, որ թեև կան բարդություններ, սակայն բոլորն էլ լուծելի են:
Գնահատման նոր համակարգի ներդրումից բացի՝ Աղաբաբյանը մեծապես կարևորեց բուհերում կրթական որակի շարունակական բարելավմանն ուղղված քայլերը, ժամանակին համընթաց քայլելու, կրթական նորագույն տեխնոլոգիաներ ներմուծելու անհրաժեշտությունը:
Մեզ հետաքրքրեց նաև ռեկտորի տեսակետը ակադեմիական քաղաքի վերաբերյալ:«Եկեք թողնենք առանց մեկնաբանության»,-ասաց Արթուր Աղաբաբյանը:
Ի դեպ՝ նշենք, որ Մովսես Խորենացու անվան համալսարանում հոկտեմբերի 20-30-ը կանցկացվեն հեռակա ընդունելության քննություններ. յուրաքանչյուր ուսանող ամեն մասնագիտությունից երկու միասնական քննություն կհանձնի:
Հավելենք նաև, որ այստեղ բոլոր մասնագիտությունները հավատարմագրված են, և շրջանավարտները ստանում են պետական դիպլոմ (բակալավրիատ, մագիստրատուրա):
Համալսարանի հասցեն է՝ Կորյունի 19ա (Ցիտադելի դիմաց), հեռախոս՝ (091) 41-15-30, (077) 23-55-50, (093) 80-60-56:
09.10.24