Դոնալդ Թրամփի նախընտրական ծրագրի հիմնական կետերն են՝ պետական սահմանների անվտանգության ապահովումը, տնտեսության զարգացումը և «առաջինը հաշվի առնել Ամերիկայի շահերը»։ Թեև նրա խոստումները, կարելի է ասել, համարձակ են, սակայն մանրամասների կարիք կա՝ հասկանալու, թե ինչպես են դրանք կյանքի կոչվելու: Հաղորդում է «Ամերիկայի ձայնը»։
«Այժմ պարզ է՝ մենք ամենաանհավանական քաղաքական կետում ենք։ Ահա, թե ինչ եղավ»,- ընտրություններից հետո հայտարարել է Դոնալդ Թրամփը։
Երբ ընտրությունների գիշերը ակնհայտ դարձավ, որ Դոնալդ Թրամփը վերադառնում է Սպիտակ տուն, հանրապետական գործիչը ելույթ ունեցավ և կրկնեց առաջիկա չորս տարիների իր օրակարգը։
Պետական սահմանների անվտանգության ամրապնդումը առաջնահերթություն է, և Թրամփը հայտարարեց, որ սկսելու է անօրիանական ներգաղթյալների արտաքսման ամենից մասշտաբային ծրագիրը ամերիկյան պատմության մեջ՝ կոչ անելով մահապատժի ենթարկել ցանկացած միգրանտի, ով սպանել է ԱՄՆ քաղաքացու։
«Մենք ստիպված ենք փակել սահմանները, և մե՛նք պետք է թույլ տանք, որ մարդիկ գան մեր երկիր: Ցանկանում ենք, որ մարդիկ գան, բայց մե՛նք պետք է թույլ տանք, որ նրանք գան օրինական ճանապարհով: Նրանք պետք է օրինական գան [մեր երկիր]»,-հայտարարել է Դոնալդ Թրամփը:
ԱՄՆ ընտրյալ փոխնախագահ Ջեյ Դի Վենսն անդրադարձել է հանրապետականների օրակարգի մեկ այլ առանցքային հարցի. «Ամերիկայի պատմության մեջ ամենամեծ քաղաքական վերադարձից հետո առաջնորդելու ենք ամերիկյան պատմության ընթացքում ամենամեծ տնտեսական վերելքը»:
«Պատրաստվում ենք մարել [պետական] պարտքերը։ Կրճատելու ենք հարկերը»,- հավելել է Թրամփը։
Պարզ չէ, թե ինչպես է Սպիտակ տան նոր վարչակազմը իրագործելու իր տնտեսական ծրագիրը՝ առանց ավելացնելու պետբյուջեի աճող դեֆիցիտը:
Թրամփն իր ելույթում հիշատակել է գործարար, միլիարդատեր Իլոն Մասկին՝ նշելով, թե նա կգլխավորի «արդյունավետության գծով կառավարական հանձնաժողովը»:
Անդրադառնալով Մասկին պատկանող ընկերություններից մեկի կողմից վերջերս տիեզերք Starship հրթիռի արձակմանը՝ Թրամփն ասել է. «Գեղեցիկ էր: Զանգահարեցի Իլոնին: Ասացի՝ Իլոն, դու՞ էիր։ Ասաց՝ այո՛։ Հարցրեցի՝ էլ ո՞վ կարող է այդ անել։ Ռուսաստանը կարո՞ղ է։ Ո՛չ։ Չինաստանը կարո՞ղ է։ Ո՛չ։ Միացյալ Նահանգները կարո՞ղ է անել՝ քեզնից բացի։ Ո՛չ։ Ոչ ոք չի կարող այդ անել։ Ասացի՝ այդ պատճառով սիրում եմ քեզ, Իլոն»։
Դիտորդների կարծիքով՝ այդ պատմությամբ Թրամփը ցանկանում էր ի ցույց դնել ԱՄՆ տեխնոլոգիական հզորությունը, որը համեմատելի չէ այլ երկրների կարողությունների հետ:
Լոնդոնի Սիթի համալսարանի սոցիոլոգ Ստեֆանի Ալիս Բեյքերն ասում է․ «Այդ խոսքերը այն մասին են, թե մենք միակ երկիրն ենք, որ կարող է նման բան անել: Կարծում եմ՝ Թրամփը ի վիճակի է օգտագործել Մասկի կերպարը՝ ներկայացնելով նրան ոչ միայն որպես բարձր տեխնոլոգիական ոլորտի ձեռներեց, այլև ի դեմս նրան ի ցույց դնել Ամերիկան»:
Իր ելույթում Թրամփը խոսել է իրեն առաջնորդող սկզբունքի մասին․«Կառավարելու եմ պարզ կարգախոսով՝ խոստումները տրվել են, խոստումները պետք է կատարվեն: Մեր խոստումները կատարելու ենք»։
Սպասենք։ Արդյո՞ք Թրամփը կկարողանա ապահովել Ամերիկայի «ոսկե դարը», ինչպես խոստացել է: