Ուժային կառույցները այն կառույցներն են, որ պետք է ուժ կիրառելու հնարավորություն ունենան, կառավարության այսօրվա նիստում հայտարարեց վարչապետ Նիկոլ Փաշինյանը։
«Բնականաբար, օրինական ու լեգիտիմ, այսինքն՝ եթե դե յուրե ու դե ֆակտո ոստիկանությունն ուժ կիրառելու իրավունք չունենա՝ ոստիկանության գոյությունն ուղղակի անիմաստ է, ոստիկանությունը դրա համար է ոստիկանություն, որ ըստ պատեհության՝ օրենքով սահմանված դեպքերում ուժ կիրառի»,- ասաց նա։
Փաշինյանը հիշեց 2016 թվականի հուլիսյան դեպքերի ժամանակ իր ասածները՝ «ոստիկանությունը պետության ողնաշարն է ու չի կարելի ոստիկանությանը թիրախավորել»։
«Ես չեմ բացառում, որ ոստիկանությունն անձամբ իմ նկատմամբ ուժ է կիրառել, վարչապետ դառնալուց հետո չեմ էլ հետաքրքրվել, ենթադրում եմ՝ շատ մարդիկ այսօր էլ ծառայում են ու դա տրամաբանական է»,- ասաց նա։
Երբ ոստիկանությանը պրիտենզիաներ է ներկայացվում ուժ կիրառելու համար, շատ դեպքերում մարդիկ չեն հասկանում, ասում են՝ «մենք մեր գործն ենք արել», ինչ-որ առումով ճիշտ են ասում, բայց ճիշտ են ասում նաև նրանք, ովքեր ասում են, որ պետք է որոշակի ձև, չափ ու սահման լինի։ Ուսումնասիրելով այս հարցը՝ մենք հասկանում ենք, որ մեր երկրում ուժի կիրառման ստանդարտ գոյություն չունի»,- կառավարության այսօրվա նիստում հայտարարեց նա։
Փաշինյանի խոսքով՝ պետք է բոլորի համար թափանցիկ լինի՝ ոստիկանությունը որ դեպքում ու ինչ պարագայում պետք է ուժ կիրառի։
«Երբ դեպք է տեղի ունենում, ուզում ենք հասկանալ՝ ի՞նչն է պատճառը, պարզվում է՝ ոստիկանության աշխատողի հասցեին հնչել է այն կարգի հայհոյանք, որը մեր իրականության մեջ համարվում է մարդու սրբությունը պղծել։ Մենք պետք է հստակ ձևակերպենք, թե այդ դեպքում ոստիկանի վարքականոնը որն է, ինքը ինչ պետք է անի»,- ասաց նա։