Ռուս-հայկական (Սլավոնական) համալսարանում երեկ տեղի է ունեցել «Պրիմակովյան ընթերցումներ Երևանում» միջազգային համաժողովը՝ նվիրված ռուսական պետական գործիչ, գիտնական Եվգենի Պրիմակովի 90-ամյակին։
Հայաստանի Անվտանգության խորհրդի քարտուղար Արմեն Գրիգորյանը միջոցառման ժամանակ իր խոսքում նշել է, որ հեղափոխությունից հետո Հայաստանում անհրաժեշտություն է առաջացել մի քանի առումներով նշելու Երևանի դերը անվտանգության գլոբալ համակարգում։
Մասնավորապես, ըստ նրա, նման համատեքստերից մեկն այն է, որ Հայաստանը ստանձնում է ակտիվ ներդրողի դեր անվտանգության ապահովման գործում՝ թե երկրի ներսում, թե նրա սահմաններից դուրս։
Նրա խոսքով՝ Հայաստանի արտաքին քաղաքական վեկտորը փոփոխություններ չի կրելու, և ունենալով մեծ պոտենցիալ շատ ուղղություններում, ջանալու է առավելագույն չափով իրացնել այն։
Ըստ ԱԽ քարտուղարի՝ դրսևորումներից մեկը, որ Հայաստանը պատասխանատվություն է վերցնում տարածաշրջանում անվտանգության ապահովման համար, իրականացվող մարդասիրական առաքելությունն է Սիրիայում։ «Այդ գործողությունները պայմանավորված են նաև պատմական համատեքստով։ Հայոց ցեղասպանության տարիներին սիրիացի ժողովուրդը առաջիններից մեկն օգնության ձեռք մեկնեց հայ ժողովրդին, և հիմա մենք վերադարձնում ենք մեր պատմական պարտքը։ Բացի այդ, մենք պատասխանատվություն ենք կրում այդ թվում նաև Հայաստանի սահմաններից դուրս ապրող հայերի համար»,- նշել է նա։
Անդրադառնալով սպառնալիքներին և մարտահրավերներին արձագանքելու ինստիտուցիոնալ հնարավորությունների ձևավորմանը՝ Արմեն Գրիգորյանն ասում է, որ այդ գաղափարը դրված է Հայաստանի իշխանությունների կողմից մշակվող երկրի անվտանգության ռազմավարության հիմքում։ «Ամբողջ համակարգը պետք է կարողանա շատ օպերատիվ արձագանքել ցանկացած սպառնալիքի, որպեսզի անհրաժեշտության դեպքում ուժային կառույցները կարողանան համատեղ գործել»,- ընդգծել է նա։
Արմեն Գրիգորյանը նաև ասել է, որ մարտահրավերների և սպառնալիքների հաղթահարման գործում կարևոր է գործընկերների հետ համագործակցությունը։
primenews.am