Ուկրաինա այցով ժամանած Գերմանիայի կանցլեր Օլաֆ Շոլցը X-ում «Կիևից ուղերձ» է հրապարակել Ռուսաստանի նախագահ Վլադիմիր Պուտինին։ Իր գրառման մեջ նա նշել է, որ Բեռլինի աջակցությունն Ուկրաինային չի թուլանա։
«Իմ ուղերձը Կիևից Պուտինին. մենք երկար ենք սրանում ներգրավված մնալու: Ուկրաինային մեր աջակցությունը չի թուլանա: Մենք կաջակցենք ուկրաինացի ժողովրդին այնքան ժամանակ, քանի դեռ անհրաժեշտ կլինի»,- գրել է Գերմանիայի կանցլերը։
Շոլցը վերջին երկուսուկես տարվա ընթացքում առաջին անգամ Կիև է ժամանել դեկտեմբերի 2-ին։ Ժամանումից հետո նա հայտարարել է 650 միլիոն եվրոյի զենքի մատակարարման մասին: Շոլցի այցն Ուկրաինա տեղի է ունեցել այն մտավախությունների ֆոնին, որ ԱՄՆ նորընտիր նախագահ Դոնալդ Թրամփը կկրճատի աջակցությունը Կիևին, ինչը կստիպի եվրոպական երկրներին իրենց վրա ավելի մեծ պարտավորություններ վերցնել:
Նոյեմբերի կեսերին Շոլցը հեռախոսազրույց է ունեցել Պուտինի հետ։ ՌԴ նախագահը, մեկնաբանելով բանակցությունները, նշել է, որ կողմերը մնացել են անփոփոխ իրենց կարծիքներում։ Կրեմլը զրույցը որակել է որպես «Ուկրաինայում տիրող իրավիճակի վերաբերյալ կարծիքների մանրամասն և անկեղծ փոխանակում»։
***
Ուկրաինայի նախագահ Վլադիմիր Զելենսկին քննադատել է Գերմանիայի կանցլեր Օլաֆ Շոլցին ՌԴ նախագահ Վլադիմիր Պուտինի հետ հեռախոսազրույցի համար՝ կոչ անելով արևմտյան մյուս առաջնորդներին չզանգել Ռուսաստանի նախագահին։ Այս մասին գրում է ozodi.org-ը:
Կիև կատարած այցից հետո Շոլցի հետ համատեղ մամուլի ասուլիսում Զելենսկին, պատասխանելով համապատասխան հարցին, ասել է, որ գիտի Ռուսաստանի նախագահին զանգահարելու Գերմանիայի կանցլերի ծրագրերի մասին, սակայն նման զրույցները, նրա կարծիքով, «չեն ուժեղացնում Ուկրաինան», և միայն նպաստում են «Պուտինի ընդունման ալիքի տարածմանը»։