Իրականում երբ լսեցի, որ խմբակցության անունից պարոն Քոչարյանը պետք է խոսի կոռուպցիային վերաբերող հարցի մասին, ես հիշեցի «Մաֆիա» խաղը, որտեղ որ «սևը» կեղծ շերիֆ է բացվում և սկսում է «կարմիր» խաղ խաղալ, բարեբախտաբար կյանքը ՀՀ-ում «Մաֆիայի» նման չի՝ հատկապես 2018 թվականից հետո: Այս մասին, այսօր՝ դեկտեմբերի 5-ին, Ազգային ժողովում ասաց ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը, հիշեցնելով, թե «Հայաստան» խմբակցության պատգամավոր Լևոն Քոչարյանի անունով ինչ բիզնեսներ կան գրանցված:
«Պարոն Քոչարյան, դուք շատ հաջողակ բիզնեսմեն եք։ Սիլիկոնային հովտում, ձեր տեղը ուղղակի չգիտեն։ Եկել, այստեղ զբաղված եք հարկատուների հաշվին օրենսդիր գործունեությամբ։ Ձեր ինչի՞ն է պետք։ Դուք «Ֆորբսի» ամենահայտնի միլիարդատերների ցուցակում հայտնվելու հնարավորություն ունեք։ Դուք պատանի տարիքում համարյա դոլարային միլիոնատեր դառնալու ճանապարհին եք եղել, հիմա եկել, այստեղ խոսում եք կոռուպցիայի դեմ պայքարից։
Պարոն Քոչարյան, ասում եք՝ ներգաղթ է եղել ձեր իշխանության տարիներին: Հայաստանի առաջին երեք նախագահների իշխանության տարիներին Հայաստանից ավելի քան մեկ միլիոն մարդ անվերադարձ հեռացել է: Եթե շատ կոպիտ հաշվարկ անենք, ԼՂ-ից բռնի տեղահանված մեր հայրենակիցները 100 հազար էին: Այսինքն, այսինքն 10 հատ Լեռնային Ղարաբաղի չափ մարդ ձեր իշխանության տարիներին անվերադարձ հեռացել է Հայաստանից։
Ասում եք՝ հաղթանակած ազգ ենք եղել: Հաղթանակած ազգի ու պետության մեջ ո՞նց է 1 միլիոն մարդ արտագաղթել: Ձեր մանկության տարիներից սկսած թանկարժեք մեքենաների պատուհանից այն կողմ, թանկարժեք պալատների պարիսպներից այն կողմ չեք տեսել, թե այդ հաղթանակը ինչ է դարձրել ձեր իշխանությունը, որովհետև դուք եղել եք իմ նկարագրած երկրում թանկարժեք մեքենանների պատուհաններից այս կողմ, և այդ պալատների պարիսպներից այս կողմ, դրա համար դուք ձեր բարեկեցությունը՝ հաղթանակած կայնքը պրոյեկտել եք հանրության վրա մտածելով, որ բոլորն այդպես են ապրում: Սա այն մաենն է, ինչ պետք է իմանալ, երբ որ դուք խոսում եք կոռուպցիայի դեմ պայքարի մասին»,- ասաց Կոնջորյանը: