Գումի շուկայի մոտ ՍԱՏՄ աշխատակիցների և մսավաճառների միջև վեճի մասնակից յոթ քաղաքացի է ձերբակալվել՝ խուլիգանության և դիտավորությամբ գույքը վնասելու անմիջական կասկածանքով։ Այս մասին հայտնեցին ՆԳՆ-ից։
Հիշեցնենք, որ վաղ առավոտյան գերլարված իրավիճակ էր Երևանի Գումի շուկայում, որտեղ ՍԱՏՄ ներկայացուցիչները կարմիրբերետավորների հետ առգրավում են մսավաճառների միսը: Ոստիկանների և մսավաճառների միջև սկսած քաշքշուկի ընթացքում մսավաճառներից մեկը փորձել է ինքնահրկիզվել, մեկ այլ մսավաճառի ինքնազգացողությունը վատացավ, նրա աչքերին արցունքաբեր գազ էին փչել։
ՆԳՆ-ից ասացին, որ դեկտեմբերի 13-ին սննդի անվտանգության տեսչական մարմնի հետ ՆԳՆ ոստիկանության ծառայողները հերթական համատեղ ստուգայցն են կատարել Երևանի Խորենացի փողոցում գտնվող մսի վաճառքով զբաղվող խանութներ՝ ստուգվել է մսի սպանդանոցային մորթի վերաբերյալ փաստաթղթի առկայությունը։ «Ոստիկանության ծառայողներն ապահովել են հասարակական կարգը։ ՍԱՏՄ աշխատակիցների և հավաքված քաղաքացիների միջև առաջացած վիճաբանության ընթացքում քաղաքացիներից մեկը բենզին է լցրել իր վրա և փորձել ինքնահրկիզվել, որը կանխվել է ոստիկանների կողմից։ Միջադեպի մասնակից ևս յոթ անձ խուլիգանության և դիտավորությամբ գույքը վնասելու անմիջական կասկածանքով ձերբակալվել, տեղափոխվել է ոստիկանություն»,- նշեցին ՆԳՆ-ից՝ հավելելով, որ նրանց վերաբերյալ կազմվում են համապատասխան փաստաթղթեր նախաքննական մարմին ներկայացնելու համար։
***
«Սննդամթերքի անվտանգության տեսչական մարմինը պարզապես իրականցնում է իր հերթական վերահսկողական գործողությունը մսի շուկայում»,- հայտնել է տեսչական մարմնի խոսնակ Անուշ Հարությունյանը՝ անդրադառնալով այսօր առավոտյան Գումի մսի շուկայում տեղի ունեցած դեպքերին։
Նրա խոսքով, այս անգամ ստուգվել է Խորենացվի փողոցում գործող մսի շուկան։
«Ինչպես պահանջում է օրենքը, և արդեն հաստատված կարգը, ոչ սպանդանոցային միսը պետք է առգրավվի և ոչնչացվի։ Առգրավում է ՍԱՏՄ տեսուչը, կշռում է, այն հանձնվում է տեղափոխող կազմակերպությանը, վերջինն էլ այն հանձնում է այրող կազմակերպությանը, որն էլ այրում է ոչնչացման ենթակա միսը»,-ասաց Ա. Հարությանը։
Տեսչական մարմնից նշեցին, որ իրենց գործողությունները միտված են քաղաքացիների առողջության պահպանմանը, որպեսզի իրենց սեղաններին չհայտնվի վտանգավոր սննդամթերք, այդ թվում միս։
«Ամեն ինչ արվում է օրենքի շրջանակում, հաստատված կարգերի համաձայն»,-ասաց նա։