Եթե Երևանին խաղաղության պայմանագիր պետք չէ, ապա Բաքվին էլ դա հարկավոր չէ։ Մենք կարող ենք ապրել առանց խաղաղության պայմանագրի։ Այս մասին տեղական լրատվամիջոցների ներկայացուցիչների հետ հանդիպման ժամանակ ասել է Ադրբեջանի նախագահ Իլհամ Ալիևը։
Նա անդրադարձել է նաև Ադրբեջանի և Հայաստանի միջև սահմանազատման հարցերին, նշելով․«Ադրբեջանի և Հայաստանի միջև սահմանազատման հարցերով հանձնաժողովների հաջորդ հանդիպումը պետք է կայանա հունվարին։ Համենայն դեպս, մենք այդպես ենք առաջարկել»։
***
Ադրբեջանի նախագահ Իլհամ Ալիևը կրկին «Զանգեզուրի միջանցքի» թեման է բարձրացրել ու պնդել, թե այն պետք է բացվի։
Ալիևը փորձել է հավաստիացնել, իբրև Ադրբեջանը Հայաստանի համար սպառնալիք «չի հանդիսանում»։
«Մենք նրանց համար վտանգի աղբյուր չենք, մենք խաղաղություն ենք ուզում և համագործակցություն՝ Հարավային Կովկասում, և թող հայերը չխանգարեն մեզ։ Նրանք չպետք է որպես աշխարհագրական խոչընդոտ ու պատնեշ հանդիսանան Թուրքիայի և Ադրբեջանի միջև։ «Զանգեզուրի միջանցքը» պետք է բացվի և կբացվի։ Որքան շուտ նրանք դա հասկանան, այնքան՝ լավ»,- հոխորտացել է Ադրբեջանի նախագահը։