Ադրբեջանը 16 հայ պատանդի նկատմամբ Բաքվում կայանալիք դատավարությանը փորձելու է կարմիր թելի պես անցկացնել ահաբեկչության մեղադրանքները։ Այս մասին Sputnik Արմենիայի հետ զրույցում ասաց իրավապաշտպան Արա Ղազարյանը` անդրադառնալով այն հանգամանքին, որ ադրբեջանական օրենսդրությամբ չի թույլատրվում այլ երկրներից փաստաբաններ ներգրավել դատավարությունների ժամանակ, հետևաբար հարց է, թե նման պարագայում ինչպես են պաշտպանված լինելու «մեղադրյալների» իրավունքները։
Նշենք, որ հունվարի 17-ին Ադրբեջանում սկսվելու է ապօրինի պահվող 16 հայ պատանդի նկատմամբ դատավարությունը։ Նրանցից 8-ը Արցախի ռազմաքաղաքական ղեկավարության ներկայացուցիչներն են` Արցախի նախկին պետնախարար, բարերար Ռուբեն Վարդանյանը, ՊԲ նախկին հրամանատար Լևոն Մնացականյանը, ՊԲ հրամանատարի նախկին տեղակալ Դավիթ Մանուկյանը, Արցախի նախկին արտգործնախարար Դավիթ Բաբայանը, ԼՂ ԱԺ նախագահ Դավիթ Իշխանյանը, Արցախի նախկին նախագահներ Արկադի Ղուկասյանը, Բակո Սահակյանն ու Արայիկ Հարությունյանը։
«Սկզբունքորեն վերահսկելու գործիք չկա և չի էլ կարող լինել, որովհետև Ադրբեջանի սուվերեն տարածքում է այդ դատավարությունն իրականացվելու։ Եթե դատավարությունը դռնփակ լինի, ապա ավելի մեծ խնդիրներ են առաջ քաշվելու, իսկ եթե լրատվամիջոցներ լինեն, ապա դահլիճի կառուցվածքից հնարավոր կլիներ հասկանալ, թե որտեղ են այսպես կոչված մեղադրյալները, պաշտպանները, մեղադրողները։ Այս դատավարությունը չի ընթանալու այնպես ու այն որակով, ինչպես Արցախում անցկացվում էին Դիլհամ Ասկերովի և Շահբազ Գուլիևի (ադրբեջանցի դիվերսանտներ) դատավարությունները։ Ընդհանուր առմամբ, Ադրբեջանն այս դատավարությամբ փորձելու է անցկացնել ահաբեկչության մասին մեղադրանքը` անցնելով կարմիր գծերը»,– նշեց Ղազարյանը։
Ստացվում է, որ Բաքուն դատում է Արցախի ռազմաքաղաքական ղեկավարությանը` դրանով իսկ թաքցնելով Արցախի բնակիչների նկատմամբ իր կատարած իրական ահաբեկչությունը։ Խոսելով միջազգային իրավունքների մասին` իրավապաշտպանը շեշտեց, որ պետք է դատավարությունն անաչառ կերպով լուսաբանվի, համապատասխան պաշտպանություն լինի։ Ղազարյանը վստահ է` Ադրբեջանում նման գործիքակազմերից տեղյակ չեն, ու զուտ պաշտպանի իրավունքի, անկախ դատարանի, անաչառ դատավորի, հակընդդեմ հարցերի իմիտացիա է լինելու։ Լրատվամիջոցների անաչառության մասին էլ ասաց, որ այնտեղ 700 լրագրողի գործադիր իշխանությունը բնակարան է նվիրել։ Անդրադառնալով ՀՀ իշխանությունների գործողություններին, թե ինչ պետք է անեին, որ Բաքվում ամեն ինչ պատշաճ կերպով իրականացվեր` Ղազարյանն ընդգծեց` այդպիսի գործիքակազմ չկա։
Հիշեցնենք, որ Բաքուն պաշտոնապես հաստատում է 23 հայերի գերեվարման փաստը, որոնցից 17-ը այնտեղ են հայտնվել Արցախի դեմ Ադրբեջանի սեպտեմբերյան ագրեսիայից հետո: Նրանց թվում են Արցախի ռազմաքաղաքական ղեկավարության ներկայացուցիչները` Արցախի նախկին պետնախարար, բարերար Ռուբեն Վարդանյանը, ՊԲ նախկին հրամանատար Լևոն Մնացականյանը, ՊԲ հրամանատարի նախկին տեղակալ Դավիթ Մանուկյանը, Արցախի նախկին արտգործնախարար Դավիթ Բաբայանը, ԼՂ ԱԺ նախագահ Դավիթ Իշխանյանը, Արցախի նախկին նախագահներ Արկադի Ղուկասյանը, Բակո Սահակյանն ու Արայիկ Հարությունյանը։