Ռուս քաղաքագետ Բոգդան Բեզպալկոն Alpha News-ի հետ զրույցում անդրադարձել է Հայաստանի և ԱՄՆ-ի միջև ռազմավարական համաձայնագրի ստորագրմանը։ Փորձագետի կարծիքով՝ դա հակասում է Հայաստանի՝ ռազմական և տնտեսական ոլորտներում Ռուսաստանի հետ դաշինքի ուղեգծին։
Ըստ նրա՝ եթե հիմա ԱՄՆ-ը ռազմավարական գործընկեր է դարձել Հայաստանի համար, ապա այս իրավիճակում դա կարող է նշանակել տարածաշրջանում որոշակի իրադարձությունների նախապատրաստություն։
«Ռուսաստանը զուսպ է արձագանքել՝ հայտարարելով, որ դա Հայաստանի սուվերեն իրավունքն է, բայց ընդհանուր առմամբ դա հակասում է ռազմական և տնտեսական ոլորտներում Ռուսաստանի հետ դաշնակցելու Հայաստանի ուղեգծին։ Եթե այժմ Հայաստանի համար ռազմավարական գործընկերը ԱՄՆ-ն է, ապա դա նշանակում է վերակողմնորոշվել դեպի նոր ուղիներ, և տվյալ իրավիճակում դա կարող է նշանակել նախապատրաստվել տարածաշրջանում որոշակի իրադարձությունների։
Այս պայմանագրի ստորագրմանը և Հայաստանի ու տարածաշրջանի նկատմամբ ԱՄՆ-ի հետաքրքրության մեծացմանը կհետևեն փոփոխությունները։ Վաղ թե ուշ հարց կառաջանա ՀԱՊԿ-ում և Եվրասիական տնտեսական միությունում Հայաստանի գտնվելու նպատակահարմարության մասին։ Ռուսաստանի և Հայաստանի միջև տնտեսական ապրանքաշրջանառությունը մեկ կարգով ավելի բարձր է, քան ԱՄՆ-ի և Հայաստանի միջև ապրանքաշրջանառությունը։ Հայաստանի ապրանքները դժվար թե վաճառվեն ԱՄՆ-ում կամ ԵՄ-ում այնպիսի ծավալներով, ինչպիսին այժմ վաճառվում է Ռուսաստանի Դաշնությունում։ Այդ պայմանագիրն ընդամենը հայկական քաղաքական էլիտաների նախապատվությունն է, կամ ուրիշի կամքին հետևելը»,-ասել է Բեզպալկոն։
Քաղաքագետի կարծիքով՝ ԱՄՆ-ի գլխավոր նպատակը լինելու է ոչ թե Հայաստանի ուժեղացումը կամ Հայաստանի կարգավիճակի որևէ բարձրացումը, այլ Ռուսաստանին տարածաշրջանից դուրս մղելը:
«Իհարկե, Ռուսաստանը կարձագանքի, եթե, ասենք, Հայաստանը հայտարարի ռուսական զինված ուժերը Գյումրիից դուրս բերելու և ընդհանրապես Հայաստանում Ռուսաստանի ռազմական ներկայությունը վերացնելու անհրաժեշտության մասին։ Եթե նա սկսի ինքնուրույն ինչ-որ գործողություններ ձեռնարկել տնտեսական կամ ռազմական ոլորտներում, օրինակ, կհրավիրի ամերիկացի զինծառայողներին պարեկություն իրականացնել կամ տեղակայվել Ադրբեջանի հետ սահմանին։ Խնդիրն այն է, որ Հայաստանն ուղղակի օգտագործում են։ ԱՄՆ-ի գլխավոր նպատակը կլինի ոչ թե Հայաստանի ուժեղացումը կամ Հայաստանի կարգավիճակի որևէ բարձրացումը, այլ տարածաշրջանից Ռուսաստանի դուրս մղումը»,-եզրափակել է Բեզպալկոն։