Ցոլակ Ակոպյանը ֆեյսբուքյան իր էջում գրել է․
«Ռուբենի գործով առաջին նիստը տեղի է ունեցել Բաքվի զինվորական դատարանում։ Նախևառաջ, միջազգային իրավունքի տեսանկյունից անօրինական է նրան դատել զինվորական դատարանում, քանի որ նա քաղաքացիական անձ է, որը երբեք չի եղել զինված ուժերի հրամանատար կամ ծառայել բանակում:Դատավարությունն այնպես է կազմակերպվել, որ թվա, թե այն բաց է հանրության համար, սակայն միջազգային մամուլին, օտարերկրյա դեսպանատներին և քաղաքացիական հասարակության դիտորդներին արգելվել է ներկա գտնվել դատավարության ընթացքին: Այնուհանդերձ, ադրբեջանական պետական լրատվամիջոցները նկարահանել և հրապարակել են դատավարությունից տեսագրություններ՝ դրանցլեգիտիմ երանգ հաղորդելու համար:
Դատական նիստը հետաձգելու միջնորդությունը բավարարվել է։ Սա, սակայն, չի էլ կարող շտկել գործընթացի բազմաթիվ և ընթացողչարաշահումները, որոնք շարունակվում են, ներառյալ այն, որ մեղադրական եզրակացության և այսպես կոչված ապացույցների մեծ մասը դասակարգվել են որպես պետական գաղտնիք, նյութերը, որոնք հասանելի են դարձել,ադրբեջաներեն են (քրեական գործով մեղադրյալներն իրավունք ունեն բոլոր նյութերի հասանելության՝ իրենց հասկանալի լեզվով), Ռուբենին արգելվել է իր ընտրած փաստաբանի հետ ուղիղ շփումից (նրա միջազգային փաստաբանին թույլ չեն տվել Ադրբեջան այցելել), նրան չեն տրամադրել իր դեմ վկաների ենթադրյալ ցուցմունքների վերաբերյալ որևէ մանրամասներ։ Ռուբենի և նրա պաշտպանի համար անհնարին է պաշտպանության նախապատրաստվել՝ առանց բոլոր ենթադրյալ ապացույցների անգլերեն կամ ռուսերեն և վկաների մասին տեղեկությունների լիարժեք հասանելիության, էլ չասած՝ պատրաստելու և ներկայացնելու թե՛ փաստաթղթային, թե՛ ցուցմունքային ապացույցներ Ռուբենի պաշտպանության համար:
Ռուբենի գործը մյուսների գործերի հետ միավորելու միջնորդությունը մերժվել է։ Մերժման պատճառները չեն հիմնավորվել, չնայած նրան, որ հայ քաղբանտարկյալներին առաջադրված մեղադրանքները շատ նույնական են։
Դատարանը հանձնարարել է քրեակատարողական ծառայությանը Ռուբենին տրամադրել պլանշետ, որը կպարունակի մեղադրական եզրակացությունը ռուսերենով, ինչպես նաև տրամադրել թարգմանիչ՝ գործի նյութերին ծանոթանալու համար։ Բայց եթե նույնիսկ նրան ամբողջությամբ հասանելի լինեն մեղադրական եզրակացությունը և ենթադրյալ ապացույցները՝ այդ ամենը շատ հեռու է բավարար լինելուց, քանի որ բավականաչափ ժամանակ և հնարավորություններ չկան՝ լիարժեք պաշտպանության նախապատրաստվելու, ներառյալ փաստաթղթային և ցուցմունքային ապացույցները հերքելու համար:
Հաջորդ դատական նիստը նշանակված է 2025 թվականի հունվարի 27-ին: Ինչպես նախորդ նիստի դեպքում՝ այն պաշտոնապես «բաց» կլինի հանրության համար։ Այնուամենայնիվ, մենք կանխատեսում ենք, որ միջազգային մամուլը, օտարերկրյա դեսպանատները և քաղաքացիական հասարակության դիտորդներին կրկին հնարավորություն չեն ունենա դատավարությանը ներկա լինելու։
Կարևոր է իմանալ
Ռուբենը զգալի ճնշման տակ է։ Քննիչները կեղծել են հարցաքննության արձանագրություններն ու նյութերը, որոնք Ռուբենը հրաժարվել է ստորագրել։
Միջազգային հանրությունը և իրավապաշտպան կազմակերպությունները պահանջում են անհապաղ կերպով և անվերապահորեն ազատ արձակել հայ քրիստոնյա քաղբանտարկյալներին և ռազմագերիներին։
Գործողության կոչ
Հայցում ենք ձեր օգնությունն այս տեղեկությունըտարածելու համար՝ Ռուբեն Վարդանյանի և մյուսհայ քաղբանտարկյալների գործի վերաբերյալ իրազեկվածությունը բարձրացնելու նպատակով՝ արդարության հասնելու և ապահովելու միջազգային իրավունքի նկատմամբ հավատարմությունը։
Ավելին, կոչ ենք անում բոլոր նրանց, ովքեր ճանաչում են միջազգային լրագրողների, դիվանագետների կամ հասարակական կազմակերպությունների ներկայացուցիչների, խրախուսել նրանց ներկա գտնվել դատական նիստին: Եթե նրանց մերժեն դատարանի դահլիճ մուտք գործելու իրավունքը, ապա խնդրում ենք, որ նրանք այդ մասին տեղեկացնեն «Ազատե՛ք հայ բանտարկյալների» թիմին՝ contact@freearmenianprisoners.com էլ․ հասցեին նամակ գրելու միջոցով»։