Մենք իշխանափոխությունը դիտարկում են որպես միջոց ժողովրդի ու մեր պետության առջև ծառացած խնդիրները լուծելու համար։ Այս մասին, այսօր՝ հունվարի 28-ին, «Եռաբլուր» պանթեոնում լրագրողների հետ զրույցում նշեց Երեւանի նախկին քաղաքապետ, ազատամարտիկ Ալբերտ Բազեյանը:
«Իշխանափոխությունից հետո հզորացնելու ենք մեր բանակը և ազատագրելու ենք Արցախը։ Արցախը հազարավոր տարիներ եղել է հայկական, ընդամենը 70 տարի է եղել Ադրբեջանի կազմում, 1921 թվին Լենին Աթաթուրք համաձայնագրով Արցախն ու Նախիջևանը թողնվել են Ադրբեջանի կազմում, 1991 թվականին Արցախը Խորհրդային Միության սահմանադրության և բոլոր օրենքներին համապատասխան հայտարարել է իր անկախությունը Ադրբեջանից։
Թուրքերը սկսել են պատերազմ, մենք հաղթել ենք այդ պատերազմում, 1994 թվականին կնքվել է զինադադարի պայմանագիր և մենք ապրում ենք մինչև 2018 թվականը մինչև Նիկոլական իշխանությանը։
Նիկոլը եկավ իշխանության ու հրահրեցին պատերազմ, Ալիևը կազմակերպեց հարձակում Արցախի վրա ու կան տվյալներ, որ Նիկոլ Փաշինյանը Ալիևի հետ պայմանավորվել է, որ Ադրբեջանը հարձակվում է Արցախի վրա, ինքը որպես Հայաստանի զինված ուժերի գերագույն գլխավոր հրամանատար այնպես է անում, որ մենք պարտություն կրենք ու ինքը Արցախը հանձնի թուրքին։ Սա ոչ այլ ինչ է, եթե ոչ դավաճանություն»,- հայտարարեց Բազեյանը:
Անդրադառնալով իր նկատմամբ հարուցված քրեական գործին, Բազեյանն ասաց. «Մեղադրանքը հետևյալն է 10-ից 15 տարի հոդված որ վեց-յոթ հոգով մենք պետք է ճեղքեինք հանրահավաքի օրը ոստիկանական մի քանի շարք բաներով պատսպարված պատնեշը բարձրանայինք կառավարության շենքը իմ ղեկավարությամբ, ֆիզիկապես ոչնչացնեինք Նիկոլին, այդպես է գրված, և բռնազավթեինք իշխանությունը։
Դատական նիստերի ընթացքում ես այդ ԱԱԾ քննիչին, ով հորինելի այդ մեղադրանքը, պարզաբանել եմ, որ Նիկոլին ֆիզիկապես ոչնչացնելով որևէ հարց չէր լուծվի։ ՔՊ-ն Ազգային ժողովում ունի բացահայտ մեծամասնություն ու իրենց մեջից որևէ մեկին կընտրեին վարչապետ և Նիկոլին կսրբացնեին, կդարձնեին նահատակ: Այնպես որ պետք է ամեն ինչ անել ժողովրդի կամքով։ Նիկոլը եսիմ ինչ մի մեծություն չի, որ կարողացավ փողոցից գալ, վերցնել իշխանություն, այնպես որ մենք, եթե ձևավորեցինք այդ իմ ասած համահայկական միասնական միասնության խորհուրդը, մեր ժողովրդին ոտքի ենք հանելու, ամբողջ Հայաստանով մենք կազմակերպելու ենք անհնազանդություն այսօրվա պարտվողական կապիտուլյանտ իշխանությանը, ապազգային իշխանությանը, հեռացնելու ենք նրանց և ձևավորվելու է ազգային իշխանություն, որը, ըստ մեր ակնկալիքների, պետք է իրականացնի մեր ազգային պետական շահերից բխող արտաքին և ներքին քաղաքականություն»: