Մենք մեկնարկում ենք մի գործընթաց, որը տեսանելի ապագայում որեւէ հեռանկար չունի, եւ բոլորս դա հսկանում ենք: Այս մասին այսօր՝ փետրվարի 12-ին, ԱԺ-ում ԵՄ-ին Հայաստանի անդամակցելու գործընթացի մեկնարկի մասին օրինագծի քննարկման ժամանակ հայտարարեց «Հայաստան» խմբակցության պատգամավոր Արմեն Ռուստամյանը:
«Այսինքն մենք մեզ փորձում ենք տանել այն ժամանակները, որ արդեն ԵՄ-ում ենք, տեսեք՝ ԵՄ-ն ինչ լավ տեղ է: Դրանով փորձում ենք ինքներս մեզ համոզել, որ այս գործընթացը մեզ օգտակար է լինելու, բերելու է շատ լավ արդյունքներ:
Երբ ասում ենք՝ Հայաստանը տարբեր միջազգային կառույցների մեջ է, դրանք իրար հետ համատեղելի չեն, ասում են՝ հիմա չի էդ հարցը, հիմա հո չե՞նք ասում, որ ԵՄ անդամ ենք: Այ, երբ ԵՄ անդամ կլինենք, այդ ժամանակ կորոշենք՝ որտեղ ենք գնում: Այսինքն մենք նպատակով, որը բոլորի համար վարդագույն երազներ է առաջացնում, արդարացնում ենք գործընթացը, որը խիստ խոցելի է: Առնվազը երեք առումով դա մեզ համար առաջացնելու է լրջագույն խնդիրներ»,-ասաց նա:
Ռուստամյանը թվարկեց այդ խնդիրները, նշելով, որ նախ առաջարկվող գործընթացը չի համապատասխանում ԵՄ-ին անդամակցության առկա գործընթացին։
«Երկրորդ, ըստ էության, մենք տարբեր կառույցների հետ աշխատելու «և-և»-ը փոխարինում ենք «կամ-կամ»-ով։ Սա լուրջ խնդիրներ է առաջացնելու: Երրորդը, CEPA-ն լավագույն ձևաչափն է Հայաստանի համար, որն ապահովում է համապարփակ ընդլայնված գործընկերություն բոլոր ուղղություններով ամենլայն առումով։ Այդ գործընթացն մենք, ըստ էության, ուզում ենք փոխարինել ԵՄ-ին անդամակցության, նոր գործընթացով»,-հայտարարեց Ռուստամյանը՝ նկատելով, որ ԵՄ-ին անդամակցումն երկկողմ գործընթաց է, բայց Հայաստանը միակողմանի հայտարարում է, որ գնում է ԵՄ։
Ըստ Ռուստամյանի, այդ նույն բանը կարելի է անել ԵՄ մտնելու մասին կառավարության հայտարարությամբ։
«Հսկայական խնդիրներ կան, որ մենք այսօր CEPA-ի պայմանագրով չենք իրականացնում: Ըստ էության, մենք մի գործընթացի մեջ ենք մտնում, որը նպատակի առումով հեռանկար չունի, բայց բուն գործընթացը մեզ համար կարող է առաջացնել լրջագույն պրոբլեմներ:
Հայաստանն այն շռայլությունը չունի, որ ընտրի՝ այստեղ է, թե՞ այնտեղ է: Մանավանդ այն պարագայում, որ այդ «կամ-կամ»-ի կողմերը պատերազմական վիճակի մեջ են: Հայաստանը շարունակում է լինել ԵԱՏՄ-ի ու ՀԱՊԿ-ի անդամ: Սա պահանջում է չմտնել այնպիսի գործընթացների մեջ, որոնք Հայաստանին կկկանգնեցնեն «կամ-կամ»-ի առջեւ:
Մենք ասում ենք՝ չէ, դեռ չենք անդամակցել, երբ այդ ժամանակը կգա, այդ ժամանակ կորոշենք: Նրանք էլ այնտեղից ասում են, թե եթե մեկնարկ եք տվել ԵՄ-ն անդամակցելու, մեկնարկ տվեք նաև այստեղից դուրս գալու: Արանքում կստացվի որ մենք ոչ այնտեղ հասանք, ոչ էլ այստեղ ամրապնդվեցինք, կախված օդում մնացինք»,-հայտարարեց Ռուստամյանը:
Նա հավելեց, որ Հայաստանը ԵՄ-ին պետք է մոտենա ոչ թե այնքանով, որքանով ԵՄ-ն է այն հնարավոր համարում, այլ որքանով դա չի սպառնում Հայաստանի անվտանգությանը և լինելիությանը։
«Երբ դուք ասում եք՝ ԵՄ, թե Ռուսաստան ընտրություն, խաբում եք ժողովրդին, մեր անվտանգության երաշխիքը դառնում է, ոչ թե ԵՄ-ն, այլ Թուրքիան, դուք, ըստ էության, Թուրքիայի և Ռուսաստանի միջև ընտրության առաջ եք դնում ժողովրդին»,-ասաց Ռուստամյանը՝ նկատելով և դրանով ոչնչացվում է պետության կենսունանուկությունը։